ShUǴYL: Ulttyq parkte 11 adamnyń ólimine qatysty kúdiktiler áli anyqtalǵan joq

Bul týraly Іshki ister mınıstrliginde ótken brıfıng barysynda vedomstvonyń baspasóz hatshysy Nurdildá Oraz málim etti.

«Ázirshe bizde bul is týraly naqty eshqandaı da kúdiktiler joq», - dedi Nurdildá Oraz brıfıng barysynda. Sonymen qatar, ol ishki ister organdary qyzmetkerlerimen jergilikti 3,5 myń turǵynnyń suralǵanyn da habarlady. Al polıtsııa osy oqıǵa barysynda múrdesi tabylǵan qoryqshynyń 51 jastaǵy ulyn izdestirýdi de jalǵastyrýda. «Ázirshe, onyń taǵdyry týraly eshqandaı da aqparat joq. Tergeý osy qylmysqa qatysty múmkin bolarlyq barlyq nusqalardy qarastyryp jatyr. Naqty nusqany tergeý múddesine oraı jarııalaı almaımyz», - dedi N. Oraz.

Eske sala ketsek, QazAqparat budan buryn habarlaǵandaı, tamyzdyń 13-i kúni Almaty oblysy Kamenskoe polıtsııa bólimshesine Taýsamaly aýylynan 30 shaqyrym shalǵaı jerdegi № 4 kordonǵa qarasty «Kordon-Aqsaı» shatqalynda eki adamnyń jansyz denesi tabylǵany týraly habarlama túsken. Sol jerge shyqqan jedel-tergeý toby Іle-Alataý ulttyq parki qoryqshysynyń úıinde onyń 53 jastaǵy áıeliniń, al aýlada 30 jastaǵy jumysshynyń máıitin anyqtady. Sondaı-aq  Aqsaı ózeni mańyndaǵy saıdan taǵy 4 adamnyń máıitin tapty. Olardyń bárin belgisiz bireýler pyshaqtap óltirgen. Qazirgi kezde mert bolǵan alty adamnyń tulǵasy belgili bolyp otyr. Shlagbaým aldynda qoryqshynyń ulyna tıesili «Nıssan-patrol» avtomashınasy, al úıden 100 metr joǵary jerde «VAZ-2121» avtomashınasy tabyldy. Avtomashına salonynda qan tárizdi qońyr tústi izder anyqtaldy. Al  25 shaqyrym shalǵaı jerde órtenip ketken № 3 kordon ormanshysynyń úıinen taǵy  5 adamnyń kúıgen múrdesi tabyldy.

Sonymen qatar, qazirgi kezde quqyq qorǵaý organdary qoryqshynyń 51 jastaǵy balasyn izdestirýge kirisken bolatyn.