ShUǴYL: Tólegen Aqylbekov «Qanypezer qubyjyqty» jeńdi
ASTANA. 9 maýsym. QazAqparat - Tólegen Aqylbekov «Qanypezer qubyjyqty» ekinshi raýndqa jetkizbeı moıyndatty.
Keshe 8 maýsym kúni Astanadaǵy «Saryarqa» velotrek kesheninde QR Prezıdentiniń Kýbogy úshin aralas jekpe-jekten MMA Halyqaralyq Týnıri ótti.
Alash-Pride KZ quramasynyń joıqyn judyryqty jigitteri bul kúni Reseı, Japonııa, Túrkııa, Ońtústik Koreı, Moldova, Lıtva jáne Rýmynııadan kelgen saıypqyrandarmen kúsh synasty. Eldi eleńdetken basty jekpe-jek qazaqtyń qaısar uly Tólegen Aqylbekov pen amerıkandyq Bob Sapptyń arasynda ótti.
Erejesiz jekpe-jek sheberi B.Sapp 1974 jyly dúnıege kelgen. Boıy 2 metr 5 sm, salmaǵy 170 keli. Aıqas alańyndaǵy qatygezdigi men jaýyzdyǵyna baılanysty «Aıýan», «Qanypezer qubyjyq» degen laqap atqa ıe bolǵan Sapp, aıýdaı aqyryp, sharshy alańǵa shyqqanda, «qalaı bolar eken?», dep búkil el demin ishine tartty.
Astanaǵa alǵash at basyn tiregen Bob Sapp Tólegendi 1-inshi raýndta-aq jeńetinin aıtqan edi. Bizdiń batyr ulymyz onyń aıtqanyn ózine istedi. Báseke bastalysymen arlandaı atylǵan qazaq uly ózinen43 keli aýyr alypty asyqtaı ıirip astyna basty. Sol beti ornynan turǵyzbaı shoıyn judyryqtarymen tópelegende «Qanypezer qubyjyq» jeńilgenin moıyndap jer sabady. Jeńis týy Tólegenniń qolynda jelbiredi.
Tólegen Aqylbekov Taraz qalasynda týǵan. Jastaıynan erkin kúrespen shuǵyldanǵan ol, kúrestiń bul túrinen birtalaı jetistikke qol jetkizip, jastar arasynda álem birinshiliginde ekinshi oryn aldy, eresekter arasynda Qazaqstan chempıony atandy. Jaraqat alýyna baılanysty kúresten alystap, 2005 jyldan bastap erejesiz jekpe-jekpen turaqty aınalysyp keledi. Laqap aty «Atılla». Osyǵan deıin 20 jekpe-jek ótkizip, onyń 17-sin jeńispen aıaqtady.
Jalpy bul kúni 10 jekpe-jek ótti. Olardyń nátıjesi boıynsha esep 5:4, jeńis qazaqstandyq quramanyń enshisinde.
Qazaqstandyq Osmanjan Qasymov pen Polsha balýany Sebastıan Grabarektiń arasyndaǵy jekpe-jek teń upaılarmen aıaqtaldy. Ekinshi kezdesýde Muhammed Azerbaevtan basym túsken Matas Stebýlıaýskas jeńiske jetti. Úshinshi jekpe-jekte qazaqstandyq sportshy Azız Amýev moldovandyq Dmıtrıı Kalmardan myqty ekendigin kórsete aldy. Tórtinshi bolyp rıngke qazaqstandyq Asıf Tagıev pen latysh Andre Zazýlıa shyqty. Bul kúreste bizdiń batyr alda boldy. Besinshi jupta túriktiń Kaan Qazǵanyn ońaılyqpen jeńgen Qaırat Ahmetov jeńisin toılady.
«Alash Praıd» komandasynyń kapıtany Asylan Toqtarbaev Polsha sportshysy Przemıslaý Dobıaldy senimdi túrde jeńdi. Shahmaral Djepısov tabandy tartysta Latvııadan kelgen Igor Kostınge ese jiberip aldy, «Naıman» laqap atyn jamylǵan Qýat Hamıtov reseılik sheber Sergeı Golıaevten utyldy, al Erjan Estanovtyń japondyq Shımızý Shýnıchıge shamasy kelmedi.
