ShUǴYL: Táýelsiz Qazaqstannyń tuńǵysh qorǵanys mınıstri, Halyq Qaharmany Saǵadat Nurmaǵambetov dúnıeden ótti

Keńes Odaǵynyń Batyry, Halyq Qaharmany Nurmaǵambetov Saǵadat Qojahmetuly 1924 jyldyń 25 mamyrynda Aqmola oblysynyń Eńbek aýylynda (qazir Aqmola oblysy Aqkól aýdany) dúnıege keldi. Saǵadat Nurmaǵambetov 1943 jyly sáýirde Kýshka qalasyndaǵy Túrkistan pýlemet ýchılışesin bitirgennen keıin maıdanǵa jiberiledi.

Soltústik Kavkaz, Ýkraın jáne Belarýs maıdandarynda vzvod, rota jáne batalon komandıri bolyp, Polsha jerinde Pılıtsa ózeniniń sol jaǵalaýyndaǵy platsdarm úshin bolǵan urysta erekshe erlik kórsetti.

1945 jyly 27 aqpanda Polsha aýmaǵynda jaýdyń myqtap bekingen qorǵanysyn buzýǵa jaýyngerlik tapsyrmany úlgili oryndaǵany, erlik pen batyldyq kórsetkeni úshin oǵan Keńes Odaǵynyń Batyry ataǵy berildi.

1946 jyldan 1949 jyldyń qarashasyna deıin M. I. Frýnze atyndaǵy Áskerı akademııada bilim aldy. Ony bitirgennen keıin Túrkistan áskerı okrýgi shtabynda qyzmet atqardy.

1954-58 j. motoatqyshtar polkiniń komandıri, 1958-61 j. motoatqyshtar dıvızııasynyń shtab bastyǵy, 1962-69 j. Qazaq KSR Azamattyq qorǵanys shtabynyń bastyǵy.

1989 jyly Orta Azııa áskerı okrýgin taratylǵannan keıin Qazaq respýblıkalyq soǵys ardagerleri keńesiniń jáne qarýly kúshter ardagerleriniń tóraǵasy boldy.

1991 jyly 25 qazanda Qazaqstan Respýblıkasynyń Prezıdentiniń Jarlyǵymen Memlekettik qorǵanys komıtetiniń tóraǵasy, al 1992 jyldyń mamyrynda QR Qorǵanys mınıstri bolyp taǵaıyndaldy.

1994 jyly 23 mamyrda QR Prezıdenti Jarlyǵymen "Halyq Qaharmany" ataǵymen marapattaldy.

1995 jyldyń qarasha aıynda armııa generaly ataǵymen otstavkaǵa shyqty.

Saǵadat Qojahmetuly Lenın, 2 Qyzyl Juldyz, 1,2- dárejeli Otan soǵysy, Qyzyl Tý, "Qurmet belgisi", Oktıabr revolıýtsııasy, "Otan" ordenderimen, medaldarmen, shetelderdiń orden, medaldarymen marapattalǵan.

1971-1994 jyldary birneshe márte Qazaqstan Joǵarǵy keńesiniń depýtaty bolyp saılandy.

Jaryqqa shyqqan kitaptary: «Lıtsom k ognıý», «Moı perednıı kraı», «A v pamıatı net tıshıny».

1999 jyly Astanadaǵy «Jas Ulan» Respýblıkalyq mektebi S. Nurmaǵambetovtiń atymen ataldy.