ShUǴYL: Tashkent oblysynda qazaqtar turatyn Qytaı tepa aýylyn buzý týraly aqparat rastalmady
TAShKENT OBLYSY. 13 qyrkúıek. QazAqparat - Ózbekstanda jappaı qazaqtar turatyn aýyl qıratyldy degen qazaqstandyq aqparat agenttikteriniń biri taratqan aqparat rastalmady. QazAqparattyń arnaıy tilshisi oqıǵa ornynan jaǵdaıdy habarlady.
Osyǵan deıin, aqparat agenttikteriniń birinde Tashkent oblysynyń ıÝkorychırchıks aýdanynyń Qytaı tepa aýylynyń qıratylǵany jaıly aqparat berilgen bolatyn. Ol jerde negizinen qazaqtar tursa kerek. Alaıda bul aqparat jalǵan bolyp shyqty.
Agenttik tilshisi joǵaryda aıtylǵan aýdanǵa barǵan kezinde belgili bolǵany, Tashkentten Gazelkentke aparatyn jol boıynda jańa úlgidegi jekemenshik úılerdyń qurylysy júrgizilip jatyr eken.
Jergilikti turǵyndardyń sózine qaraǵanda, aǵymdaǵy jyldyń mamyr aıynda memlekettik organdar eski úılerdi buzyp, aýyldyq jerdi abattandyrýǵa baılanysty jáne týrısterge arnalǵan ınfraqurylymdar salý úshin memlekettik baǵdarlama aıasynda jańa úıler salý týraly sheshim shyǵarǵan kórinedi. Úıleri buzylýǵa ketken otbasylarǵa 6 sotyq jer ýchaskeri men bank esebine orta eseppen alǵanda 40 myń AQSh dollary aýdarylǵan. Paıdalanýǵa berilgen jer ýchaskelerinde jańa turǵyn úılerdiń qurylysy júrgizilip jatyr.
Turǵyndardyń aıtýyna qaraǵanda, Qytaı tepa aýylynda negizinen qazaqtar turady, sondyqtan jol boıyndaǵy buzylǵan 17 úıdiń qazaq otbasylaryna tıesili ekeni tańǵaldyratyn jaǵdaı emes.
