ShUǴYL: Statıstıka agenttiginiń burynǵy basshysy A. Meshimbaeva Birikken Arab Ámirlikterinde boı tasalap júr

Bul týraly búgin QR Parlamenti Májilisiniń jalpy otyrysynda Bas prokýrordyń orynbasary Iogan Merkel málim etti.

Esterińizge sala keteıik, Májilistiń búgingi otyrysynda «Qazaqstan Respýblıkasy men Birikken Arab Ámirlikteri arasyndaǵy Qylmyskerlerdi ustap berý týraly kelisimdi ratıfıkatsııalaý týraly» zań jobasy talqylanǵan bolatyn. Sonyń barysynda Bas prokýrordyń birinshi orynbasary Birikken Arab Ámirlikteri aýmaǵynda 7 qazaqstandyq azamat jasyrynyp júrgenin atap ótti. «Interpol málimetterine oraı, Arab Ámirlikterinde qazaqstandyq sottan jasyrynyp júrgen 7 azamattyń bar ekendigi málim boldy. Olardyń arasynda Statıstıka agenttiginiń burynǵy basshysy da bar», -dedi I. Merkel. Onyń aıtýynsha, qylmystyq is boıynsha agenttiktiń burynǵy basshysymen keltirilgen zalal 758 mıllıon teńge bolyp otyr. Bul qarajat kezinde ulttyq sanaqty júrgizýge bólingen bolatyn.

«Atalǵan elde sondaı-aq «Kakadý» JShS burynǵy dırektorynyń da boı tasalap júrgeni belgili boldy. Ol Astanadaǵy «Qypshaq» turǵyn úı kesheniniń qurylysy barysynda jarty mıllıardqa jýyq teńgeni jymqyrǵany anyqtalǵan», - dedi I. Merkel. Onyń sózine qaraǵanda, barlyq izdeýde júrgen qazaqstandyqtarǵa qatysty BAÁ-ge ustap berý týraly talap joldanǵan. Alaıda ondaı talap áli kúnge qarastyrylmaı otyr. «Degenmen, osy kelisimdi ratıfıkatsııalasaq, biz sol eldegi qylmyskerlerdi elimizge qaıtarýǵa múmkindik alamyz», - dedi ol.