ShUǴYL: Senat Aýǵanstanǵa ásker jiberý týraly kelisimdi qabyldamaı tastady
ASTANA. 9 maýsym. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasy men Soltústik Atlant Sharty Uıymy arasyndaǵy Aýǵanstandaǵy Qaýipsizdikke járdemdesý halyqaralyq kúshteriniń qyzmetine qatysý týraly notalar almasý nysanyndaǵy kelisimdi ratıfıkatsııalaý týraly» QR Zań jobasyn qabyldamaı tastady.
Esterińizge sala keteıik, Májilis maquldaǵan atalǵan zań jobasy boıynsha Qazaqstannyń 4 áskerı ofıtserin Aýǵanstanǵa jiberý kózdelgen bolatyn. Osyǵan baılanysty kelisim qoǵam arasynda da úlken rezonans týdyrǵany belgili. Degenmen, Májilis maquldaǵan qujatty Senat depýtattary "Konstıtýtsııaǵa sáıkes kelmeıdi" dep keri qaıtardy.
«Qazaqstan álemdik qaýipsizdik pen beıbitshilik kelisimdi saqtaý máselesinde halyqaralyq qoǵamdyqtyq aldynda óziniń tyń bastamalaryn kóterip, zor úles qosyp keledi. Sonymen qatar elimiz Aýǵanstan máselesine, onyń ishki turaqtylyǵy men qaýipsizdigine, aýǵan halqynyń beıbit ómiriniń qamtamasyz etilýine járdem kórsetip, gýmanıtarlyq sıpattaǵy kómekterin jasap keledi. Al talqylanyp otyrǵan kelisim beıbitshilik pen qaýipsizdikti qoldaý jónindegi halyqaralyq shart boıynsha halyqaralyq mindetterdi oryndaý úshin áskerı qyzmetshilerdi paıdalaný tártibin retteýge baǵyttalyp otyr. Alaıda Konstıtýtsııamyzdyń 53-babynyń 5-tarmaǵyna sáıkes, atalmysh másele boıynsha sheshimdi palatalardyń birlesken otyrysynda Parlament qabyldaýy tıis», - dedi Zań jobasy boıynsha túsinik bergen senator Muhtar Altynbaev.
Osyǵan baılanysty depýtat zań jobasyn tutastaı qabyldamaý jáne ony Májiliske qaıtarýdy usyndy. Daýys berý arqyly Senat qujatty qabyldamaý týraly sheshimge keldi.
Esterińizge sala keteıik, atalmysh zań jobasyn Májilis aǵymdaǵy jyldyń 18 mamyrynda maquldaǵan bolatyn. Sol kezde qoǵamda "Aýǵanstanǵa Qazaqstan Qarýly Kúshteriniń kontıngenti jiberiledi eken" degen áńgime jeldeı esip ketken edi.
Al 23 mamyrda Astanada ótken aptalyq brıfıngte QR Syrtqy ister mınıstrliginiń resmı ókili Asqar Ábdirahmanov: "Qazaqstan men NATO arasyndaǵy kelisim Aýǵanstandaǵy halyqaralyq kúshterdiń Kabýlda ornalasqan shtabyna 4 qazaqstandyq ofıtserdi jiberýdi qarastyrady. Sondyqtan Aýǵanstanǵa Qazaqstan Qarýly Kúshteriniń kontıngenti jiberiledi degen áńgime artyq aıtylǵan sóz", - dep málimdegen bolatyn. .
Onyń sózine qaraǵanda, bul aýǵan halqynyń ózi tańdaǵan jáne BUU moıyndaǵan Aýǵanstan úkimeti men Parlamentine qaýipsizdikti qamtamasyz etý jáne beıbit ómirdi qalpyna keltirý boıynsha halyqaralyq qoldaý sharalaryna atsalysý bolyp tabylady. «Jalpy Aýǵanstandaǵy halyqaralyq koalıtsııaǵa búginde 47 memleket qatysýda. Onyń 19-y NATO-ǵa múshe emes memleketter. Al 6-aýy Islam konferentsııasy uıymyna kiredi»,-dep atap kórsetken bolatyn resmı ókil.
A. Ábdirahmanov elimizden Aýǵanstanǵa jiberý josparlanyp otyrǵan 4 mamannyń 2-eýi áskerı sarapshylar, 1-eýi dáriger, 1-eýi tyl uıymdastyrýshys ekenni eske salyp ótken edi.
Al 27 mamyrda QR Cyrtqy ister mınıstrliginde ótken QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysy barysynda syrtqy saıasat vedomstvosynyń basshysy Erjan Qazyhanov Aýǵanstanǵa jiberiletin qazaqstandyq 4 ofıtserge sol eldiń úkimeti men halqyn beıbit ómirge daıarlaý mindeti júkteletinin atap kórsetken bolatyn. «Bul rette toqtala ketetin jaıt, BUU qararyna sáıkes, bundaǵy negizgi áńgime Kabýlǵa tórt qazaqstandyq ofıtserdi jiberý týraly bolyp otyr. Sonymen qatar, ondaǵy bizdiń ofıtserlerge júktelgen negizgi mindet Aýǵanstan úkimeti men halqyn beıbitshilikke, tynysh ómirge daıarlaýǵa járdemdesý bolyp tabylady. Sondaı-aq, bizdiń áreketimiz BUU Qaýipsizdik keńesiniń mandatyn qatań saqtaý sheńberinde júzege asyp otyrǵanyn da atap ótkim keledi», - degen bolatyn mınıstr.
