ShUǴYL: Prezıdenttik saılaý boıynsha ázirge eshqandaı resmı nátıjeler shyǵarylǵan joq - AQSh elshisi
Bul týraly búgin Astanada AQSh-tyń Qazaqstandaǵy elshisi Kennet Feırfaks málimdedi.
«Saılaý bul burynnan kele jatqan dástúr. Bizdiń memleketimiz táýelsiz el bolyp tabylady, sondyqtan da biz ár 4 jyl saıyn demokratııanyń negizine oralyp otyratyn saılaý múmkindigimen maqtanamyz. AQSh-taǵy prezıdenttik saılaýdyń barysyn bizben birge baıqaý úshin qazaqstandyq qoǵamdastyqtyń kóptegen ókilderi keldi»,-dedi AQSh elshisi.
Prezıdenttik saılaý boıynsha ázirge eshqandaı resmı nátıjeler shyǵarylmaǵanyna toqtalǵan ol, CNN jáne BBC telearnalarynda Prezıdent Obama qaıta saılanatynyn, ıaǵnı bul dodada jeńiske jetetinin habarlaǵanyn tilge tıek etti. «Alaıda, olar eki kandıdattyń da nátıjeleri ózara teń ekenin aıtýda. Romnı prezıdenttik saılaý dodasynan shyqqandyǵyn málimdegen joq. Sondyqtan da naqty qorytyndy áli belgisiz»,-dedi Kennet Feırfaks.
