ShUǴYL: Osy ýaqytta Qazaqstannyń respýblıkalyq mańyzy bar barlyq joldary ashyq

Bul týraly búgin «Qazaqavtojol» RMK-nyń baspasóz qyzmetinen habarlady.

Atap aıtqanda, keshe keshqurym aıazǵa baılanysty tórt oblystyń aýmaǵyndaǵy respýblıkalyq joldarda kólik qozǵalysyna shekteý qoıylǵan bolatyn.

Máselen, Pavlodar oblysynyń barlyq baǵyttarynda qoǵamdyq jáne dızel otynymen júretin kólikterge jolǵa shyǵýǵa tyıym salynǵan edi. Sonymen qatar, Qaraǵandy oblysy aýmaǵynda da barlyq baǵyttarda qoǵamdyq, júk, dızel otynymen júretin kólikterdiń qozǵalysyna shekteý qoıyldy. Al ShQO aýmaǵyndaǵy «Omby-Maıqapshaǵaı» avtojolynyń 587-733 shaqyrymy ýchaskesindegi «Pavlodar oblysy shekarasy-Semeı» aralyǵynda da osyndaı shekteýler engizilgen bolatyn. Osy joldardyń barlyǵy búgin saǵat 08:00-den bastap ashyldy.

Buǵan qosa, keshe saǵat 19:15-ten beri Aqmola oblysyndaǵy «Astana-Ereımentaý-Shiderti» jolynyń 16-205 shaqyrymyndaǵy «Astana-Pavlodar oblysy shekarasy» aralyǵynda da qoǵamdyq jáne dızeldik otynmen júretin kólikter úshin jol jabylǵan edi. Bul jolda da búgin tańǵy 07:00-den bastap kólik qozǵalysy jandandy.