ShUǴYL: Memleket basshysy ınflıatsııany boljanǵan dálizde ustaý qajettigine jáne zeınetaqy qorlaryn retteýge qatysty naqty tapsyrmalar berdi
ASTANA. 10 sáýir. QazAqparat - Ulttyq banktiń 2011 jylǵy esebi qaralǵan keńes barysynda QR Prezıdenti Nursultan Nazarbaev aıyrbas baǵamy saıasatyna, ınflıatsııany boljanǵan dálizde ustaý qajettigine jáne zeınetaqy qorlaryn retteýge qatysty naqty tapsyrmalar berdi.
G.Marchenko Prezıdentke Ulttyq banktiń ınflıatsııa protsesterin baqylaý jáne aıyrbas baǵamynyń saıasaty jónindegi qyzmeti týraly baıandady. Ulttyq banktiń esebin tanystyra otyryp, G.Marchenko 2011 jyl barlyq negizgi makroekonomıkalyq kórsetkishter boıynsha Qazaqstan úshin jaqsy jyl bolǵanyn atap ótti.
Memleket basshysy Ulttyq qor aktıvterin basqarý, saqtandyrý naryǵyn damytý jáne Kedendik odaqqa múshe elderdiń aqsha-nesıe saıasatyndaǵy qyzmetin úılestirý máselelerine nazar aýdardy.
Keńeske Prezıdent Ákimshiliginiń Basshysy A.Mýsın, Ulttyq bank Tóraǵasy G.Marchenko, Premer-Mınıstrdiń orynbasary Q.Kelimbetov, «Samuryq-Qazyna» ulttyq ál-aýqaty qory» AQ basqarma tóraǵasy Ó.Shókeev, Prezıdent Ákimshiligi Basshysynyń orynbasary B.Sultanov, Qarjy mınıstri B.Jámishev, Ekonomıkalyq damý jáne saýda mınıstri B.Saǵyntaev, Ulttyq bank basshylyǵy, sondaı-aq Ulttyq banktiń qarjy naryǵyn jáne qarjy uıymdaryn retteý men baqylaý komıtetiniń basshysy qatysty.
