ShUǴYL: Mańǵystaý oblysynyń Jańaózen qalasynda bolǵan tártipsizdikterdiń saldarynan 10 adam mert boldy, jaralylar bar - QR Bas prokýrory
ASTANA. 16 jeltoqsan. QazAqparat /Aıdar Ospanalıev/ - Mańǵystaý oblysynyń Jańaózen qalasynda bolǵan tártipsizdikterdiń saldarynan 10 adam mert boldy. Bul týraly búgin atalmysh máselege baılanysty jýrnalıstermen bolǵan brıfıngte Qazaqstan Respýblıkasynyń Bas prokýrory Ashat Daýylbaev málim etti.
Onyń sózine qaraǵanda, búgin tańǵy saǵat 11.30 shamasynda Mańǵystaý oblysynyń Jańaózen qalasyndaǵy merekelik sharalar barysynda bir top azamattardyń zańsyz áreketteriniń saldarynan jappaı tártipsizdikter oryn aldy. Qalanyń Ortalyq alańynda Táýelsizdiktiń 20 jyldyǵyn atap ótý úshin jınalǵan beıbit turǵyndarǵa buzaqylar shabýyl jasady.
«Buzaqylar qoǵamdyq tártipti dóreki túrde buza otyryp, tártip saqshylaryna shabýyl jasady. Olar Jańa jyldyq shyrshany tóńkerip, merekege arnaıy qoıylǵan kıiz úıler men sahnany qıratty jáne polıtseılerdiń avtobýsyn jaǵyp jiberdi. Buzaqylar qalanyń beıbit turǵyndaryn tepkiniń astyna jyǵyp, alańda turǵan kólikterdi talqandady»,-dedi Bas prokýror.
Onyń sózinshe, qoǵamdyq tártipti buzýshylar tártip saqshylarynyń zańsyz áreketterdi toqtatý jónindegi talaptaryna baǵynbaı, polıtsııa qyzmetkerleriniń qarýlaryn tartyp alý maqsatynda olardyń óziderine shabýyldaǵan.
«Olar osy zańsyz áreketteriniń barysynda sýyq qarý men otty qarýdy paıdalandy. Jappaı tártipsizdik barysynda qalalyq ákimdiktiń ǵımaraty men «Ózenmunaıgaz» kompanııasynyń ǵımaraty men qonaq úıi órtendi. Sonymen qatar jeke jáne zańdy tulǵalardyń múlikteri talqandalyp, kólikter órtendi, bankomattar tonaldy. Aldyn ala málimetterge qaraǵanda osy oqıǵanyń saldarynan 10 adam mert boldy. Sondaı-aq dene jaraqattaryn alǵandar da bar. Jaraqattanǵan azamattardyń arasynda tártip saqshylary da kezdesedi. Osy ýaqytta atalǵan jappaı tártipsizdik áreketteri boıynsha qylmystyq is qozǵaldy»,-dedi A.Daýylbaev.
Onyń aıtýynsha, Memleket basshysynyń tapsyrmasy boıynsha, Іshki ister mınıstri Qalmuhambet Qasymov bastaǵan jedel-tergeý toby Jańaózen qalasyna ushyp ketti. Atalmysh top onda zańsyz áreketterdi toqtatyp, ony uıymdastyrýshylardy jazalap, qalada tártip ornatýǵa kúsh salatyn bolady. «Bas prokýratýra jappaı tártipsizdikti uıymdastyrýshylarǵa osy áreketteri úshin zań aldynda jaýap beretindikterin eskertip, zańsyz áreketterdi toqtatýǵa shaqyrady. «Quqyq qorǵaý organdary azamattardyń tynyshtyǵy men qaýipsizdigin buzǵandardyń barlyǵyna tosqaýyl qoıady»,-dedi Bas prokýror.
