ShUǴYL: «Magnum» saýda kesheni tóbesi qardyń ýaqytyly tazalanbaǵynan opyrylyp tústi
ASTANA. 4 naýryz. QazAqparat - «Magnum» saýda kesheniniń tóbesiniń ortasyna túsýiniń negizgi sebebi, qardyń ýaqytynda tazalanbaı aýqymdy jınalyp qalýynan bolǵan, - dep habarlaıdy Astana qalasy ákimi apparatynyń baspasóz qyzmeti Jumyldyrý daıyndyǵy, azamattyq qorǵanys, tótenshe jaǵdaılar jáne tabıǵı apattardy eskertý men joıý jónindegi basqarma bastyǵy Tımýr Ábijanovqa silteme jasap.
«Magnum» saýda keshenindegi metallqurylymnyń opyrylyp, ortasyna túsýi (jalpy kólemi 600 sharshy metr) qar ýaqytynda tazalanbaǵandyqtan, kóp jınalýy salmaǵynan bolǵan. Saýda kesheni tóbesindegi qardyń qalyńdyǵy 2 metr shamasynda», - dep atap kórsetti T.Ábijanov.
Tótenshe jaǵdaı oryn alǵan saýda ortalyǵy «Magnum» Cash & Carry SK» JShS menshigi bolyp tabylady. QR Azamattyq Kodeksiniń 189 babyna sáıkes ózine tıisti múliktiń barlyq aýyrtpalyǵyn menshik ıesiniń ózi kóteredi.
«Astana qalasynyń TJ Departamenti 112 qyzmeti pýltine 2013 jyldyń 3 naýryzynda 00 saǵ. 26 mınýtta «Magnum» saýda kesheniniń kúzet qyzmetkeri Samat Muqashevtan Astana qalasy, Alash tas joly 23/1 mekenjaıynda ornalasqan «Magnum» saýda kesheniniń tóbesi opyrylyp ortasyna túskeni týraly habarlama kelip tústi», - dep túsindiredi T.Ábijanov.
Onyń aıtýynsha, 00 saǵ.03 mınýtta tótenshe oqıǵa oryn alǵan jerge alǵashqy bolyp órtke qarsy qyzmeti bólimshesi kelip jetken. Tótenshe jaǵdaıdy joıýǵa TJM-niń barlyq bólimsheleri men tehnıkalary, jeke quramy, ІІD jeke quramy, «Astana Sý Arnasy» MKK, «Teplotranzıt» AQ, «Astana REK» AQ jeke quramdary men «103» qyzmeti jumyldyryldy. Barlyǵy - 29 tehnıka, jeke quramnan - 259 adam qatysty.
«Úıindiniń astynan eki zardap shegýshi qutqaryldy. Biri: kúzet qyzmetkeri, biraz jaraqat alǵan 1988 jyly týǵan A.N.Isteleev aýrýhanaǵa jatqyzylsa, ekinshisi, 1991 jyly týǵan J.B. Bákir dárigerlik kómekten bas tartty».
TJ qyzmetkerleri kelgen kezde tóbeniń odan ári qulaý qaýip boldy. Sondyqtan, 50 adam qaýipsiz jerge kóshirildi.
Tótenshe jaǵdaı faktisi boıynsha Astana qalasy ákimdiginiń janynan qala ákiminiń orynbasary Vasılıı Krylovtyń basshylyǵymen vedomstvoaralyq komıssııa quryldy.
