ShUǴYL: Qulsary qalasyndaǵy lańkestikke qarsy operatsııa barysynda 5 adamnyń máıiti jáne aýyr jaraqattanǵan bir adam tabyldy - Bas prokýratýra
ASTANA. 12 qyrkúıek. QazAqparat - 2012 jylǵy 5 qyrkúıekte Atyraý qalasynyń Moldaǵulova kóshesindegi jeke úılerdiń birinde qoldan jasalǵan jarylǵysh zattyń jarylýy oryn alǵany belgili.
Jarylys nátıjesinde alǵan jaraqattardan oqıǵa bolǵan jerde 1991 jyly týǵan Saqaýov Nurlybek Amanǵalıuly qaza boldy.
QR Bas prokýratýradan málim etkendeı, qaraý kezinde qoldan jasalǵan 3 jarylǵysh qurylǵy, sondaı-aq osyndaı qurylǵylarǵa komponentter tabylyp, alyndy.
Saqaýov kúshtik qurylymdardyń qyzmetkerlerine qatysty kúsh qoldaný áreketterin jasaý ıdeıalaryn ustanyp júrgeni anyqtaldy.
Bul fakt boıynsha Qazaqstan Respýblıkasy Qylmystyq kodeksiniń 24 jáne 233 baptarymen (Terrorızmge daıyndalý) qylmystyq is qozǵalyp, tergelýde.
Tergeý sheńberinde osy qylmystyń 4 qatysýshysy anyqtalyp, sottyń sanktsııasymen qamaýǵa alyndy.
Búgin, 2012 jylǵy 12 qyrkúıekte Atyraý oblysy Qulsary qalasynyń 1-shi shaǵynaýdanyndaǵy kóppáterli turǵyn úılerdiń birinde quqyq qorǵaý organdary qyzmetkerleriniń kórsetýi boıynsha terrorıstik toptyń qyzmetine qatysy bar taǵy birneshe tulǵa anyqtaldy.
Osyǵan baılanysty, olardy ustaý jáne zalalsyzdandyrý maqsatynda terrorızmge qarsy operatsııa jarııalandy, ony ótkizý aımaǵynda erekshe quqyqtyq rejım engizildi, turǵyndardy evakýatsııalaý júrgizilip, oqshaýlaý qoıyldy.
"Arnaıy qurylymdardyń qyzmetkerleri qandaı da bir áreketter jasaýdy bastaǵanǵa deıin oqshaýlanǵan tulǵalar birneshe jarylǵysh qurylǵyny jaryp, oq atý qarýlarymen arnaıy bólimshe qyzmetkerlerine qaraı ata bastady. Bir qyzmetker jaraqat aldy.
Arnaıy operatsııa nátıjelerimen oqıǵa bolǵan jerden 5 máıit jáne aýyr jaraqat alǵan bir adam tabyldy.
Beıbit turǵyndar arasynda qurbandar men zardap shekkender joq.
Qazirgi ýaqytta oqıǵa bolǵan jerdi qaraý, basqa da kúttirmeıtin tergeý jáne jedel-izdestirý is-sharalary júrgizilýde", - delingen Bas prokýratýranyń taratqan baspasóz aıǵaǵynda.
