ShUǴYL: QR Premer-Mınıstri tutynýshylardyń kommýnaldyq qyzmetter úshin «saqaldy» qaryzdaryn «syzyp» tastaýdy tapsyrdy
ASTANA. 9 qazan. QazAqparat - Búgin Úkimet otyrysynda Premer-Mınıstr Serik Ahmetov kommýnaldyq qyzmetter úshin «saqaldy» qaryzdardy jyl aıaǵyna deıin sheshýdi tapsyrdy.
Belgili bolǵandaı búginde kommýnaldyq qyzmetter úshin debıtorlyq bereshek 8 mlrd. teńgeni qurap otyr. Esterińizge sala keteıik, buǵan deıin Úkimet ákimdikterge debıtorlyq bereshekti 50 paıyzǵa tómendetýge tapsyrma bergen edi.
«Búginde respýblıka boıynsha bereshek 8 mlrd. teńgeni qurap otyr. Jalpy bul sheshilmeıtin úlken problema emes qoı», - dep toqtaldy S. Ahmetov.
Onyń paıymdaýynsha, jylý berý maýsymyna baılanysty atalǵan qaryzdardy jabý úrdisi júrip jatyr. Birqatar ákimdikter bereshekti eki esege deıin tómendetýge qaýqarly.
«Atap aıtqanda, bul másele boıynsha maqsat-mindetti tótesinen qoıý kerek. Biz jáne ákimdikter jańa jylǵa deıin bereshekti barynsha azaıtý kerek. Jańa jyldy qaryzsyz bastaý qajet»,-dedi Premer-Mınıstr.
Onyń sózine qaraǵanda, kásiporyndarmen birige otyryp, jyldan-jylǵa kóship kele jatqan kommýnaldyq qaryzdardy múmkindik bolǵansha "syzyp" tastaǵan jón.
Úkimet basshysynyń aıtýynsha, jyldan-jylǵa kóship júrgen «saqaldy» qaryzdar turǵysynda ony ótemeıtinder bar. «Olardy ákimder biledi. Osy boryshkerler bári bir eshqashanda qaryzyn jappaıdy. Sonymen qatar turǵylyqty jerden ketip qalǵandar da bar. Bul qaryzdar jyldap, qordalanyp jınaqtalýda. Osy qaryzdar kommýnaldyq kásiporyndarda debıtorlyq nemese kredıtorlyq bereshek retinde jınaqtaldy. Bul qaryzdardy ustap turǵannan ne paıda? Bul máseleni qalaıda sheshý kerek»,-dedi S. Ahmetov.
Osy oraıda Premer-Mınıstr tıisti organdar men ákimdikterge «saqaldy» qaryz máselesin sheshý boıynsha tapsyrma berdi.
