ShUǴYL: QR ІІM basshysy V. Chelahqa jeke kamera berýden bas tartýdyń sebebin túsindirdi
ASTANA. 16 qazan. QazAqparat - QR Іshki ister mınıstri Qalmuhanbet Qasymov búgin Úkimet otyrysynan keıin jýrnalısterdiń suraqtaryna jaýap berý barysynda óz qarýlastaryn óltirdi degen aıyp taǵylǵan Vladıslav Chelahqa jeke kamera berýden bas tartylǵandyǵyn málimdedi.
«Oǵan jeke kamera berýden bas tartyldy. Sebebi qylmyskerlerdi ustaýdyń arnaıy erejesi sondaı», - dep túsindirdi Q. Qasymov.
Buryn BAQ-ta habarlanǵandaı, V. Chelah ózine-ózi qol jumsamaq bolǵannan keıin, týystary tergeý ızolıatorynyń basshylyǵynan ony jeke kameraǵa kóshirýdi suraǵan bolatyn.
Esterińizge sala keteıik, 30 mamyrda aımaqtyq «Shyǵys» shekara qyzmeti basqarmasynyń Úsharal shekara otrıadynyń «Sary bókter» shekara zastavasynyń narıady jazǵy ýaqytta 15 jaýynger qyzmet etetin «Arqankergen» shekara beketiniń órtengen ǵımaratyn kóredi.
Tekserý barysynda kazarmalar men ofıtserlik úıden 13 adamnyń órtengen deneleri anyqtaldy. Al taǵy bir múrde beket mańynan ótetin ózenniń jaǵasynan tabyldy. Sonymen qatar,»Arqankergen» beketinen 150 metr qashyqtyqta ornalasqan ańshylyq sharýashylyǵynyń kúzetshisi avtomattan birneshe ret atylyp óltirilgen Rýslan Kımniń denesi tabylǵan edi.
4 maýsymda shekara qyzmetkerleri shaban qystaqtarynyń birinde tyǵylyp jatqan «Arqankergende» áskerı boryshyn atqarǵan shekarashylardyń biri Vladıslav Chelahty ustaǵan bolatyn. Ony tintý kezinde kapıtan Kereevke tıesili azamattyq kıim-keshek, tapansha jáne noýtbýk, sondaı-aq basqa áskerı qyzmetkerlerdiń uıaly telefondary tabyldy. Sol kúni óz advokatynyń qatysýymen V. Chelah qyzmettesterin jáne Rýslan Kımdi óltirgendigin moıyndady.
Budan buryn QR Bas áskerı prokýratýrasy málimdegendeı, 2012 jyldyń 11 qyrkúıeginde LA-155/16 ishki postynyń kezekshileri mekemeniń kameralaryn barlaý kezinde V. Chelahtyń óziniń sporttyq shalbaryn terezeniń toryna baılap, soǵan asylyp ólmek bolǵan is-áreketiniń ústinen túsken bolatyn. Tekseris kezinde V. Chelahtyń denesinen eshqandaı jaraqat tabylmaǵan, al densaýlyǵy qanaǵattanarlyq bolǵan.
