ShUǴYL: Qazaqstan polıtseıleri poıyzdarda beınekameralar ornatpaq
ASTANA. 27 sáýir. QazAqparat - Qazaqstannyń ІІM Kóliktegi ishki ister departamenti qylmys jıi jasalatyn jolaýshylar poıyzdarynda beınekameralar ornatýdy josparlaýda.
Bul týraly búgin baspasóz máslıhatynda vedomstvonyń qoǵamdyq qaýipsizdik basqarmasynyń bastyǵy Ámirjan Aqsholaqov málim etti.
Onyń sózine qaraǵanda, beınekameralar vagonnyń ishinde ǵana emes, syrtynda da ornalastyrylatyn bolady. Brıgadırlik vagonnyń toǵyzynshy kýpesinde poıyzdaǵy jalpy qaýipsizdik jaǵdaıyn taldap otyratyn kishigirim ortalyq jabdyqtalady. «Bul sharalar jolaýshylardy tonaý jáne terezelerdi syndyrý oqıǵalaryn azaıtýǵa múmkindik beredi», - dedi Á. Aqsholaqov.
Sondaı-aq beınekameralar jolserikterdiń óz qyzmetin salǵyrt atqarýǵa, bıletsiz jolaýshylar men zańsyz júkterdi tasymaldaýǵa tosqaýyl bolmaq.
Onyń atap ótkenindeı, atalmysh ıdeıa «Jolaýshylar tasymaly» AQ basshylyǵynyń úlken qoldaýyna ıe boldy.
