ShUǴYL: Qarjy polıtsııasy Atyraý oblysy ákimdiginiń jáne merdigerlik uıymdardyń basshylaryna qatysty qylmystyq isterdi tergeýdi aıaqtady
ASTANA. 24 sáýir. QazAqparat - Qarjy polıtsııasy agenttigi Atyraý oblysy ákimshiliginiń laýazymdy tulǵalary jáne merdigerlik uıymdardyń basshylarymen jasalǵan sybaılas jemqorlyq jáne ekonomıkalyq qylmystar faktisi boıynsha qylmystyq isterdiń tergeýin aıaqtady.
Bul týraly búgin Ekonomıkalyq qylmysqa jáne sybaılas jemqorlyqqa qarsy kúres agenttiginde ótken baspasóz máslıhatynda vedomstvonyń resmı ókili Murat Jumanbaı málimdedi.
Onyń aıtýynsha, atalǵan qylmystyq isterdi tergeý barysynda tergeý jedel toby 68 saraptama jasap, 750-den astam adamnan jaýap aldy, 9 tintý júrgizdi, 30 myńnan astam qujatty tárkiledi. Tergeý tobymen atqarylǵan jumys nátıjesinde Atyraý oblysynyń aýmaǵynda oblystyń burynǵy ákimi Bergeı Rysqalıev quryp onyń basshylyǵymen 6 jyldan astam ýaqyt áreket etken qylmystyq qaýymdastyq joıyldy.
«Anyqtalǵanyndaı, B. Rysqalıev ókilettikke ıe bola tura memlekettik qarajatty urlaý maqsatynda 35 adamnan quralǵan 3 uıymdasqan qylmystyq toptan turatyn uıymdasqan qylmystyq qaýymdastyq qurǵan»,-dedi M. Jumanbaı.
Onyń aıtýynsha, qaýymdastyq quramyna Atyraý oblysynyń basshylary, ıaǵnı ákimniń birinshi orynbasary Dáýkenov, orynbasary Ábdirov, oblys ákimshiliginiń basqarma bastyqtary, sondaı-aq sybaılas kásipkerler men týysqandary kirgen.
Tergeýdiń 8 aıynda qylmystyq qaýymdastyqtyń múshelerine qatysty uıymdasqan qylmystyq topqa qatysý, bıýdjet qarajatyn urlaý, jalǵan kásipkerlik, qyzmettik ókilettikti teris paıdalaný, para alý, alaıaqtyq jáne basqa da qylmystar boıynsha 73 qylmystyq is qozǵaldy.
Resmı ókildiń atap ótýinshe, aýyr jáne asa aýyr qylmystar jasady degen aıyppen 11 adam qamaýǵa alyndy. Olardyń ishinde oblys ákimshiliginiń burynǵy apparat jetekshisi Kerimov, qarjy basqarmasynyń bastyǵy Jantemirov, memlekettik sáýlet-qurylys baqylaý basqarmasynyń bastyǵy jáne basqa da tulǵalar bar. Sondaı-aq, 10 adam úı qamaýynda, 2 adamǵa eshqaıda ketpeý týraly bultartpaý sharasy taǵaıyndaldy.
«Aǵymdaǵy jylǵy 18 sáýirde atalǵan 23 tulǵaǵa aıyptar taǵylyp, olardyń qylmystyq isiniń materıaldarymen tanystyrý protsedýrasy bastaldy»,-dep atap ótti resmı ókil.
