ShUǴYL: Qaraǵandy oblysynda polıtsııa qyzmetkerleri uıymdasqan qylmystyq top múshelerin ustaý barysynda qarý qoldanýǵa májbúr boldy

Bul aqparatty atalǵan oblystyń ishki ister departamentiniń baspasóz qyzmeti taratyp otyr.

«Qaraǵandy oblysynyń Aqtoǵaı aýdanynda, «Prıozersk-Saryshaǵan» avtojolynda 12 mamyr kúni shamamen  saǵat 17:00-de «Toıota Skepter» avtokóliginiń júrgizýshisi ishki ister bólimi qyzmetkeriniń kólikti toqtatý týrasyndaǵy zańdy buıryǵyna baǵyndaı, polıtsııa avtomashınasyn qaǵyp, boı tasalaýǵa tyrysty. Sonymen qatar «Toıota Skepter» kóliginen ishki ister bólimi qyzmetkerlerine qaraı oq atyldy. Kúdiktilerdi tutqyndaý úshin oblystyq ishki ister departamentiniń «Arlan» qyzmetiniń qyzmetkerleri   7 márte  oq atty», delingen baspasóz habarlamasynda.

Polıtsııa qyzmetkerleriniń aqparatyna qaraǵanda, atalǵan kólik Saryshaǵan eldi mekeninde ustalǵan. Onda tórt adam bolǵan.  Olar Saryshaǵan eldi mekeni men Prıozersk qalasynyń turǵyndary. Kúdiktilerden birneshe qarý tárkilengen.

Taratylǵan aqparatqa qaraǵanda, 27 jáne 32 jastaǵy azamattar polıtsııa qyzmetkerleriniń tabeldi qarýynan jaraqat alǵan. Olardyń biriniń jambasyna, al ekinshisiniń basyna oq tıgen. Jaralanǵandar aýrýhanaǵa jetkizilip, kúzet qoıyldy. Al taǵy eki kúdikti ýaqytsha oqshaýlaý ornyna qamaldy. Tergeý amaldary júrgizilýde.

«Tabeldi qarý qoldaný prokýratýra tarabynan zańdy dep tanyldy», - delingen habarlamada.