ShUǴYL: Interpol men Bas prokýratýra Ispanııadan Keles Mámbetovti ekstradıtsııalady

ASTANA. QazAqparat - Búgin QR Bas prokýratýrasynyń jáne ІІM Interpol Bıýrosy Ulttyq ortalyǵynyń qyzmetkerleri 2004 jyly qasaqana adam óltirgen jáne halyqaralyq izdeý jarııalanǵan Keles Mámbetovti Ispanııadan ekstradıtsııalady.

Bul týraly QR Bas prokýratýrasynyń baspasóz qyzmeti habarlady.

2009 jyly Ispanııadaǵy Interpol Qazaqstannyń ýákiletti organdaryna izdeýde júrgen K.Mámbetovtiń 2007 jyly Ispanııa aýmaǵynda jasyrynyp jáne jalǵan qujattardy paıdalana otyryp, qylmys jasaǵany úshin 7 jylǵa bas bostandyǵynan aıyrylǵany týraly habarlaǵan bolatyn.

«Qazaqstannyń Bas prokýratýrasy sol sáttegi bizdiń memleketter arasynda ekstradıtsııalaý týraly kelisimniń bolmaýyna qaramastan, ıspandyq tarapqa ony berý týraly suraý saldy. Ispanııa bıligi jasalǵan qylmystyń aýyrlyǵyn eskere otyryp, tergeý júrgizý ýaqytyna ony qazaqstandyq tarapqa berdi», - delingen habarlamada.

Aıta keteıik, tergeý qorytyndysy boıynsha, kúdiktiniń kisi óltirý aıyby tolyqtaı dáleldendi. Astana qalasynyń qylmystyq ister boıynsha aýdanaralyq sotynyń 2011 jylǵy 18 naýryzdaǵy úkimimen Mámbetov 14 jylǵa bas bostandyǵynan aıyrýǵa sottaldy. Úkim zańdy kúshine engen soń, aldyn ala kelisimge sáıkes, 2011 jyldyń mamyrynda ol Ispanııaǵa joldandy.

Sóıtip, ıspandyq sottyń belgilegen jazasyn tolyq ótegen soń, Mámbetov Otanyna ekstradıtsııalandy.

«Ispanııa Koroldiginiń bul sheshimi qylmyspen kúres salasyndaǵy bizdiń elder arasyndaǵy jolǵa qoıylǵan qarym-qatynasty eskere otyryp, sondaı-aq 2012 jyly jasalǵan memleketaralyq kelisimge sáıkes qabyldandy», - dep atap kórsetilgen vedomstvonyń málimdemesinde.

Qazirgi ýaqytta K.Mámbetov Astana qalasynyń tergeý abaqtysyna ornalastyryldy.