ShUǴYL: Elordalyq mektepterdiń ashanasynan qurttar men taraqandar tabylyp jatyr
ASTANA. 29 qarasha. QazAqparat - Mekteptegi tamaqtandyrý júıesin tenderden alyp tastaý qajet. Bul týraly búgin Astana ákimdiginde ótken dóńgelek ústel barysynda «Ádilet» tutynýshylar quqyǵyn qorǵaý odaǵy tóraǵasynyń orynbasary Tursyn Jaqparova málim etti.
«Bizdiń «senim telefondaryna» túsken aryz-shaǵymdar boıynsha, dámhanalarda taraqandar júgirip júr, taǵamdardan, sýsyndardan qurttar tabylýda. Qadaǵalaý júıesi bolamaǵandyqtan, olar oılaryna kelgenin istep jatyr. Biz bıyl, byltyr da Úkimetke, Qarjy mınıstrligine, QR Bilim jáne ǵylym mınıstrligine mekteptegi tamaqtandyrý júıesin tenderden alyp tastaý jóninde usynys tastadyq», - dedi T.Jaqparova.
Onyń aıtýynsha, anyqtalǵan faktiler týraly tıisti memlekettik organdarǵa joldanatyn bolady.
«Bul tipti orynsyz dúnıe. Sebebi bir balany 90-110 teńgege qalaı tamaqtandyrýǵa bolady?! Biz júrgizgen tekserý barysynda Astanadaǵy 28 orta mektepten túrli deńgeıdegi zań buzýshylyqtar anyqtaldy. Mysaly, palaýda 1 gramm et qana tabylǵan. Sondaı palaýdy qaıdan kórdik?! Tenderge qatysqanda, olar tizim boıynsha ara balyn berip jatyrmyz deıdi. Biraq balalar bal jemek túgili, ony kózderimen de kórmegen. Kóptegen as úılerde sanıtarlyq talaptar óreskel buzylýda. Tapsyrysty alsa boldy. Biz olardyń tizimin beremiz, memlekettik organdar jazalasyn», - deıdi maman.
