ShUǴYL: Ekstremıster 6 áıeldi balalarymen birge Іle-Alataý ulttyq tabıǵı saıabaǵy aýmaǵyndaǵy jertólede ustaǵan - Bas prokýratýra
ASTANA. 29 tamyz. QazAqparat - Buǵan deıin habarlanǵandaı, 2012 jylǵy 11 shildede Almaty oblysy, Qarasaı aýdany, Taýsamaly kentiniń Seıfýllın kóshesindegi № 98 úıde jarylys bolyp, nátıjesinde 9 adam qaza bolǵan edi.
Qaza bolǵandardyń tórteýi - áıel adam, beseýi - balalar. Tekserý kezinde úıden jáne sharýashylyq jaılardan Kalashnıkov qol pýlemeti, 4 avtomat, 2 tapansha, 2 revolver, «Vepr» karabıni, sholaq myltyq, úlken kólemdegi oq-dáriler, 7,5 qapshyq selıtra jáne qoldan jasalatyn jarylǵysh qurylǵynyń basqa komponentteri, janǵysh suıyq qospasy bar 5 ydys, 4 ratsııa jáne polıtseılik ábzel tabylǵan. Bul týraly QR Bas prokýratýrasynyń aspasóz qyzmeti habarlady.
Bul fakt boıynsha sol kúni Qazaqstan Respýblıkasy Qylmystyq kodeksiniń 24 jáne 233 baptarymen (terrorızmge daıyndalý) qylmystyq is qozǵalǵan. Qylmystyq isti tergeý barysynda bul faktige basshysy jáne belsendi músheleri Taýsamaly kentindegi jarylystan jábirlenbegen jáne quqyq qorǵaý organdarynan boı tasalap qashyp úlgergen uıymdasqan qylmystyq toptyń qatysy bar ekendigi týraly obektıvti dálelder tabyldy. Kórsetilgen qylmystyq toptyń quramyna 13 adam kirgen, onyń 9- buǵan deıin aýyr qylmystary úshin birneshe ret sotty bolǵan.
Atap aıtqanda, toptyń esirtkige táýeldi basshysy «Tórt aǵaıyndy (Chetyre brata) » uıymdasqan qylmystyq toptyń quramynda bolǵan jáne qarýdy zańsyz saqtaǵany jáne bopsa jasaǵany úshin eki ret sottalyp, 10 jyldan astam ýaqyt bas bostandyǵynan aıyrý ornynda bolǵan. Dinı ekstremızm ıdeologııasyna boı urǵan qylmystyq toptyń músheleri ózderiniń zańǵa qaıshy áreketterine syltaý taýyp, jańa qylmystar, sonyń ishinde Qazaqstannyń ártúrli aımaqtarynda terrorıstik aktiler jasaýdy josparlaǵan. Ózderiniń qylmystyq pıǵyldaryn iske asyrý maqsatynda top músheleri boı tasalaýdy qatań ustanǵan, bir-birimen tek laqap attarymen tildesken, turǵylyqty jerlerin únemi aýystyryp otyrǵan, jalǵan qujattardy nemese bóten adamdardyń joǵalǵan qujattaryn paıdalanǵan. Quqyq qorǵaý organdarymen júrgizilgen jedel-izdestirý is-sharalarynyń nátıjesinde atalǵan uıymdasqan qylmystyq toptyń basshysy men músheleri 2012 jylǵy 16 tamyzda Almaty oblysy Qarasaı aýdany Úlken Almaty aýyldyq okrýginiń «Tań» saıajaı alaby úıleriniń birinde ekendigi anyqtaldy.
Berilý jónindegi birneshe qaıtalanǵan usynystarǵa olar qarsylyq bildirip, arnaıy bólimshe qyzmetkerlerine qarýlardan oq ata bastaǵan. Bul rette arnaıy bólimsheniń bir qyzmetkeri oq tıip, jaraqat aldy. Osyǵan baılanysty, dereý terrorızmge qarsy operatsııa júrgizý jóninde sheshim qabyldandy, jaqyn turǵan úılerdiń turǵyndary qaýipsiz jerge jetkizilip, oqshaýlaý uıymdastyryldy. Arnaıy operatsııa kezinde qylmyskerler jasyrynǵan úıde órt shyǵyp, tóbe jabyndysynyń qulaýyna jáne úı-jaıdyń edáýir bóliginiń janýyna ákep soqty. Búgingi kúnge oqıǵa bolǵan jerden 13 adamnyń órtenip ketken máıitteri tabyldy. Barlyq máıitter boıynsha ólim sebepterin anyqtaý úshin sot-medıtsınalyq jáne jeke bastaryn anyqtaý úshin genomdyq saraptama belgilendi. Oqıǵa bolǵan jerden birneshe atys qarýy jáne úlken kólemdegi oq-dáriler, áskerı jabdyq elementteri, sondaı-aq dinı taqyryptaǵy kitaptar tabyldy. Sondaı-aq, terrorızmge qarsy operatsııany júrgizý kezinde úıde qylmyskerlerden basqa adamdar bar ekendigi jóninde derekter bolmaǵanyn atap ótemiz. Alaıda, arnaıy operatsııanyń aıaqtalý barysynda úıde qylmyskerlermen birge kámeletke tolmaǵan adamnyń bolǵany belgili boldy. Qylmystyq top músheleriniń anyqtalǵan áıelderiniń jaýaptaryna qaraǵanda, olardyń kúıeýleri óz balalaryn analarymen aralastyrmaı, uzaq ýaqyt boıy jáne kúshtep ustap otyrǵan kórinedi.
Sonymen qatar, ózderiniń áıelderin ózdiginen dalaǵa shyǵýlaryna jáne týystarymen baılanysýlaryna tyıym salyp, qujattarsyz jáne aqshalaı qarajattarsyz Almaty qalasyndaǵy jáne qala mańyndaǵy ártúrli jaldamaly páterlerde qamaýda ustaǵan. Atap aıtqanda, 2012 jyldyń 20 shildesinen 12 tamyzyna deıin qylmystyq toptyń músheleri 6 áıeldi balalarymen birge Іle-Alataý ulttyq tabıǵı saıabaǵy aýmaǵyndaǵy taýly-ormandy jerde salynǵan berik jertólede ustaǵan. Bul áıelderdiń jaýaptary boıynsha osy jertóleniń ishinde qylmyskerlerdiń áıelderiniń bireýi 2012 jylǵy 4 tamyzda bosanǵan. Qazirgi ýaqytta tergelýdegi is boıynsha kýá retinde ótip jatqan osy áıeldermen dárigerler jáne psıhologtar jumys jasaýda. Qylmystyq is boıynsha tergeý jáne jedel-izdestirý is-sharalary jalǵasýda. Qylmystyq toptyń joıylǵan músheleriniń Aqsaı shatqalynda jasalǵan jappaı kisi óltirý oqıǵasyna qatystylyǵy jónindegi boljam tekserilýde. Basqa aqparat tergeý múddesine sáıkes ashylmaıdy.
