ShUǴYL: «Býlgarııa» teplohody qurbandarynyń arasynda Qazaqstan azamattary joq
ASTANA. 11 shilde. QazAqparat /Damır Baımanov/ - QR Tótenshe jaǵdaılar mınıstrligine «Býlgarııa» teplohodynda qaza bolǵandardyń arasynda Qazaqstan azamattary bolǵandyǵy týraly aqparat túsken joq.
Bul týraly jýrnalısterge búgin baspasóz máslıhatynda mınıstrliktiń tótenshe jaǵdaılardy joıý departamentiniń dırektory Dıhanbek Satylǵanov málim etti.
«Biz reseılik áriptesterimizben baılanystamyz. «Býlgarııa» teplohody qurbandarynyń arasynda qaza bolǵan bizdiń azamattarymyz týraly aqparat túsken joq. Ázirge ol jaqta qaza bolǵandardyń sanyn anyqtaý jumystary júrip jatyr. Degenmen, bizde de, Reseıde de jedel baılanys jelileri jumys isteýde. Bizdegi nómir - 112», - dedi D.Satylǵanov.
Esterińizge sala keteıik, «Býlgarııa» teplohody keshe, 10 shilde kúni kúndiz Tatarstanda Kýıbyshev sý qoımasynda apatqa ushyraǵan bolatyn. Keme jaǵalaýdan 3 shaqyrymdaı jerde sýǵa batyp, 20 metr tereńdikke túsken. Apatqa jaısyz aýa raıy - qatty jel men nóser jańbyr sebep bolǵan degen paıymdaýlar aıtylýda.
Qaza bolǵandar men iz-túzsiz joǵalǵandardyń sany - 120 adam. Sońǵy málimetter boıynsha, 79 adam qutqarylǵan. Keme bortynda 197 týrıst, ekıpaj músheleri jáne birneshe tirkelmegen tulǵalar bolǵan.
