ShUǴYL: Búgin Almatyda birneshe dúkender men basqa da nysandar órtke orandy

Almaty qalalyq órtke qarsy qyzmetiniń habarlaýynsha, órttiń aýmaǵy aldyn ala derekter boıynsha 280 sharshy metrdi quraǵan.

QazAqparat tilshisiniń oqıǵa ornynan habarlaýynsha, osy saýda ǵımaratynda ornalasqan 1 azyq-túlik dúkeni, 2 shashtaraz, 1 doner, 1 dámhana , 1 samsahana, 1 ustalǵan kıimder (sekond-hend) dúkeni jáne bir et pavılony tolyǵymen órtenip ketken.

Órt týraly alǵashqy habar órt sóndirý qyzmetiniń kezekshi bólimine kúndizgi saǵat 13:47-de kelip túsipti. Órt sóndirýshiler oqıǵa ornyna 13:54 mınýtta kelip jetken. Saǵat 14:20-da órt aýyzdyqtaldy. Al 16 saǵat 10 mınýtta sóndirildi.

Tilsiz jaýdy joıýǵa 8 negizgi tehnıka, 2 arnaıy tehnıka 35 adam jumyldyrylǵan.

Qazirgi sátte órttiń shyǵý sebepteri anyqtalýda. Kýágerlerdiń aıtýynsha, órt et pavılonynyń ústinen, shatyr men ǵımarat tóbesiniń arasynan shyqqan. Aldyn ala boljam boıynsha osy jerdegi elektr symdary ystyqtan syrtqy oqshaýlaǵysh qabattary erip, tuıyqtalyp ketken bolsa kerek.

Abyroı bolǵanda adam shyǵyny joq. Jáne órt osy ǵımaratqa janasa ornalasqan (ara qashyqtyǵy 1 metrden sál astam) kórshi ǵımaratqa ótip ketpegen. Adamdar janqııarlyqpen áreket jasap, saýda ornyndaǵy barlyq gaz ballondaryn syrtqa shyǵaryp úlgergen.

«Órt aıaq astynan oryn aldy. Shatyr jaqtan shyqty. Áne-mine degenshe búkil ǵımaratqa tarady. Biz tek azyn-aýlyq et ónimderin qolymyzǵa ustaı sala syrtqa shyǵyp úlgerdik. Pavılon tolyǵymen janyp ketti. Úlken shyǵynǵa ushyrap otyrmyz. Onyń kólemi bir mıllıon teńgeden kem emes», - dedi et pavılonynyń satýshysy Serik.

Ustalǵan kıimder dúkeniniń ıesi Janar da óziniń kúızelisin jasyrmady.

«Men de basqa kásipkerler sekildi osy ǵımarattyń bir buryshyn jaldap otyrmyn. Barlyq zattarym, taýarlarym túgelge jýyq janyp ketti. Kem degende 600 000 teńge shyǵyn kórip otyrmyn» - dedi ol óz sózinde.

Bir qabatty saýda ǵımaratynyń saqtandyrylǵan-saqtandyrylmaǵany ázirge belgisiz.

Qazirgi sátte órttiń shyǵý saldary, keltirilgen shyǵyndar anyqtalý ústinde.