ShUǴYL: Bilim jáne ǵylym mınıstri oqýshy týystarynyń mektep ustazyn uryp-soǵýyn kúpirlik dep baǵalady
ASTANA. 15 naýryz. QazAqparat - Bilim jáne ǵylym mınıstri Baqytjan Jumaǵulov Almatydaǵy № 151 mekteptiń ustazdarynyń birin oqýshy týystarynyń uryp-soǵýyn kúpirlik dep baǵalap otyr.
Bilim jáne ǵylym mınıstrliginiń málimetterinshe, bul oqıǵa jóninde Bilim jáne ǵylym mınıstrligi de, Almaty qalalyq bilim basqarmasy da habardar. Osy oqıǵadan soń zardap shekken ustaz oqýshynyń ata-analaryn sotqa berdi. Qazirgi tańda bul máselemen sot aınalysýda jáne sottyń sheshimimen mektep ákimshiligi endigári mundaı áreketterdiń aldyn alý úshin tıisti shara qoldanatyn bolady.
Al mınıstrdiń ózi bul jaǵdaıǵa bylaısha baǵa berdi: «Kez kelgen adamdy soqqynyń astyna jyǵý bul kemshilik emes, baryp turǵan qylmystyń ózi. Ustaz qashanda halyq qadir tutyp, qurmetteıtin qasıetti mamandyq ıesi bolyp esepteledi. Osy sebepti biz ustazdarǵa ózimizdiń eń dúnıedegi qymbat qundylyǵymyz - urpaǵymyzdy, olardyń bolashaǵyn senip tapsyramyz. Al mundaı adamǵa qol kóterý kúpirlik. Men árıne sot sýdıasy emespin jáne osy árekettiń aq-qarasyn sot ókilderi ajyratady. Soǵan qaramastan men qoǵam bolyp, el bolyp, ustazdardy osyndaı áreketterden qorǵaıtyn tetikter qalyptastyrýymyz qajet dep sanaımyn. Sondyqtan bul másele bilim berý salasynyń barlyq deńgeıinde basty nazarda bolady. Men ony ózimniń jeke baqylaýyma alamyn», - dedi mınıstr.
Esterińizge sala keteıik, 1 naýryz kúni buqaralyq aqparat quraldary mektep muǵalimi Ashan Shametovtiń 6-shy synyp oqýshysyna eskertý jasaǵannan keıin oqýshy óziniń ata-analaryna shaǵymdanǵany jóninde habarlaǵan bolatyn. Osydan keıin oqýshynyń ata-analary mektepke baryp, ustazben áńgimelerin bitirgen soń, polıtsııa organdaryna habarlaǵan. Bul áreketterdiń barlyǵy beınekameraǵa túsken. Al polıtsııa qyzmetkerlerine oqýshy qyzdyń ata-anasy muǵalimniń qyzyn jıi uratyndyǵyn aıtqan.
Oqýshynyń týystarynan soqqy alǵan ustaz - A.Shametovke medıtsınalyq tekserýden ótip, emdelý qajet. Mektepke ol tek tolyq saýyqqannan keıin ǵana keledi. Oǵan qazir kompıýtermen jumys isteýge jáne televızor kórýge tyıym salynǵan.
