ShUǴYL: Beıbit Ystybaev «Qazaqstan barysy» atandy

Jeńimpazǵa «Qazaqstan barysy» altyn belbeýi men 150 myń AQSh dollary, altyn taıtuıaq jáne temir tulpar berildi. Al, onyń bapkeri Eldos Dalabaıǵa 50 myń AQSh dollary tabys etildi.

Jeńimpaz óz sózinde búgingi jeńisin Jambyl oblysy men ata-anasyna arnaıtynyn jetkizdi.

Kúmis júldege Shalqar Jolamanov ıe boldy.Oǵan 30 myń, bapkeri Qanat Súleımenovke 10 myń AQSh dollary kóleminde syıaqy berildi. 

Qos palýan da byltyrǵy jylǵy týrnırde jeńis tuǵyryna kóterilgen edi. Sol kezde Beıbit Ystybaev kúmis júldege ıe bolsa, Shalqar Jolamanov qola medalǵa ıe bolǵan.

 Qola medaldy alǵan Aıbek Nuǵymarovqa 10 myń AQSh dollary, al onyń bapkeri, Qazaqstannyń eńbek sińirgen jattyqtyrýshysy Serik Qorjykenovke 13 myń AQSh dollary berildi.

 Eń jas palýan Rýstam Jumaev «Kórermen kózaıymy» atanyp, 10 myń dollar júldege  ıe boldy.

Eske sala keteıik, bıylǵy «Qazaqstan barysy-2012» týrnırine  ár oblys pen Astana, Almaty qalalarynan 32 palýan iriktelgen edi. Sondaı-aq byltyrǵy «Qazaqstan barysy» Ulan Rysqul men Olımpıada oıyndaryna qatysýshy Erjan Shynkeev irikteýden tys qatystyryldy. Alaıda, Erjan Shynkeev qola júlde úshin básekede Aıbek Nuǵymarovtan, Ulan Rysqul Batys Qazaqstandyq Arman Ábeýovten jeńildi. Beıbit Ystybaev: Laqap aty: Taraz Arlany. Týǵan jyly: 1985. Boıy: 193, salmaǵy: 135. Týǵan jeri: Jambyl oblysy, Talas aýdany, Kóshek batyr aýdany. Sporttyq ataǵy: Qazaq kúresinen halyqaralyq dárejedegi sport sheberi. Sporttyq jetistikteri: Qazaq kúresinen Álem jáne Azııa chempıony, 2011 jylǵy respýblıkalyq «Qazaqstan Barysy» týrnıriniń kúmis júldegeri. Bapkeri: Eldos Dalabaı.