ShUǴYL: Bes oblys aýmaǵyndaǵy respýblıkalyq joldar áli de jabyq
ASTANA. 14 jeltoqsan. QazAqparat - Aıazǵa baılanysty keıbir óńirlerdegi respýblıkalyq joldar áli de ashylǵan joq.
Bul týraly búgin «Qazaqavtojol» RMK baspasóz qyzmeti habarlady.
Máselen, keshe saǵat 18:00-den bastap aýa temperatýrasynyń kúrt tómendeýine baılanysty Pavlodar oblysy boıynsha barlyq baǵyttarda avtokóliktiń barlyq túrleri úshin jolǵa shyǵýǵa tyıym salyndy.
Al Qaraǵandy oblysy boıynsha keshe saǵat 15:00-den bastap Pavlodar oblysyndaǵy aýa temperatýrasynyń kúrt tómendeýine baılanysty "Qyzylorda-Pavlodar" jolynyń 1069-1135 shaqyrymyndaǵy "Molodejnyı-Pavlodar oblysy shekarasy" aralyǵynda qoǵamdyq, júk jáne dızel otynymen júretin avtokólikter úshin jol jabyldy.
Budan bólek, keshe keshqurym aýa temperatýrasynyń kúrt tómendeýine baılanysty Shyǵys Qazaqstan oblysy boıynsha barlyq baǵyttarda qoǵamdyq jáne dızel otynymen júretin avtokóliktiń qozǵalysyna tyıym salyndy. Búgin saǵat 07:00- den bastap bul jol ashyldy.
Onymen qatar keshe saǵat 18:30-dan bastap "Omby-Maıqapshaǵaı" jolynyń 587-733 shaqyrymyndaǵy "Pavlodar obl. shekarasy-Semeı qalasy" aralyǵynda avtokóliktiń barlyq túrleri úshin jol jabyldy.
Almaty oblysy boıynsha keshe "Almaty-Óskemen" jolynyń 558-615 shaqyrymyndaǵy "Rýbej beketi- Shyǵys Qazaqstan oblysy shekarasy" ýchaskesinde qoǵamdyq dızel otynymen júretin avtokóliktiń qozǵalysyna tyıym salyndy. Bul jol búgin tańerteńgi saǵat 7-den bastap qaıta ashyldy.
Aqmola oblysynda keshe keshqurym aýa temperatýrasynyń kúrt tómendeýine baılanysty Aqmola oblysy boıynsha barlyq baǵyttarda qoǵamdyq, júk jáne dızel otynymen júretin avtokóliktiń túrleri úshin jolǵa shyǵýǵa tyıym salyndy.
Aıta keteıik, Soltústik Qazaqstan oblysynda jol-jóndeý jumystarynyń júrgizilýine baılanysty 11 jeltoqsannan bastap kóliktiń barlyq túrleri úshin jabylǵan Petropavl qalasynan aınalyp ótetin avtojol (3 shaqyrym) áli de ashylǵan joq.
