ShUǴYL: Bas prokýratýra Ábilázovti ekstradıtsııalaý týraly Frantsııa sotyna ótinish joldady
Bul týraly búgin Bas prokýratýrada ótken brıfıng barysynda vedomstvonyń resmı ókili Nurdáýlet Súıindikov málim etti.
Resmı ókildiń aıtýynsha, Qazaqstannyń quqyq qorǵaý organdarymen BTA banktiń 5 mlrd-tan astam AQSh dollary somasyndaǵy qarajatyn urlaǵan jáne qylmystyq jolmen tabylǵan kiristerdi zańdastyrǵan uıymdasqan qylmystyq top quryp jáne basqarý faktileri boıynsha qylmystyq isti tergeý jalǵasýda. Salymshylardyń, qazaqstandyq jáne halyqaralyq nesıe berýshilerdiń qarajattary ınvestıtsııalanǵan júıe qurýshy bank aktıvterin urlaý M.Ábilázovke aıyp taǵýǵa negiz boldy jáne oǵan 2009 jyly 6 naýryzda halyqaralyq izdeý jarııalandy. Sonymen qatar, Ábilázov Reseı men Ýkraınanyń quqyq qorǵaý organdarymen izdestirilýde. «Byltyrǵy jyldyń aqpan aıynda Ulybrıtanııadaǵy London Joǵarǵy sotyn qurmettemegendigi úshin Ábilázovke 22 aı merzimge túrmege qamaý túrindegi jaza taǵaıyndaldy. Alaıda ol aǵylshyn sot tóreliginen jaltaryp ketti. Aǵymdaǵy jyldyń 31 shildesinde Interpol Ábilázovtiń Frantsııa aýmaǵynda ustalǵanyn habarlady. Al 1 tamyzda Eks-an-Provans qalasynyń sotymen Frantsııanyń qylmystyq-protsessýaldyq zańnamasyna sáıkes, Ábilázovtiń 40 táýlikke deıin qamaýda ustalýy sanktsııalandy. Osyǵan oraı, ekstradıtsııamen baılanysty barlyq rásimder aıaqtalǵansha Ábilázov Lıýın qalasynyń túrmesinde bolady. Al 2 tamyzda QR Bas prokýratýrasy Ábilázovti ekstradıtsııalaý týraly ótinish joldady», - dedi N.Súıindikov.
