ShUǴYL: Bakýde lańkestiktiń aldy alyndy
BAKÝ. 20 qańtar. QazAqparat /Berik Hamıdov/ - Ázirbaıjannyń ulttyq qaýipsizdik mınıstrligi Bakýde josparlanǵan lańkestiktiń aldyn aldy.
Bul týraly ÁR UQM-niń baspasóz qyzmeti habarlady.
Mınıstrliktiń jedel-izdestirý sharalarynyń barysynda qoǵamdyq qaıratkerlerge qastandyq jasaýǵa daıyndalǵan qylmystyq top áshkerelendi. Olar lańkestik áreketin uıymdastyryp, sonymen qatar oq qarýy, oq-dári, jarylǵysh zattar men jabdyqtar sııaqty qaýipti zattardy satyp alǵan jáne basqa da qylmystardy uıymdastyrýmen aınalysqan degen aıyppen ustaldy.
Ázirbaıjannyń azamaty Alıev Rasım Farılogly,Gýseınov Alı Alıhamzaogly, sondaı-aq Ardebıl qalasy men Iranda turatyn Dadashev Balagardash Alısafaogly qaraqshylyq, kisilerdi urlaý jáne tonaý sıqty qylmystary úshin izdeýde júrgen qylmyskerler, olar basqa da adamdarmen aldyn ala sóz baılasyp, qoǵamdyq qyzmetpen aınalysatyn qaıratkerlerge qastandyq jasamaq bolǵan.
UQM-niń jedel sharalary nátıjesinde Rasım Alıev pen Alı Gýseınov ózderiniń josparlaǵan lańkestik áreketin iske asyra almaı, qolǵa tústi.
UQM-niń bas izdestirý basqarmasy ÁR QK-niń 28, 277 baby (qylmysty daıyndaý, memlekettik nemese qoǵamdyq qaıratkerdiń ómirine qastandyq jasaý (lańkestik akt), 206.3.2 baby (qylmystyq toptyń aldyn ala kelisim boıynsha kontabandamen aınalysýy) jáne 228.2.1 (oq qarýyn zańsyz satyp alý, saqtaý, ótkizý, oq qarýyn tasymaldaý nemese ustap júrý, sonymen qatar oq-dári, jarylǵysh zattar sııaqty qaýipti zattardy ózimen birge alyp júrý) qylmystyq isi boıynsha tergeý jumystaryn bastady.
