ShUǴYL: Astanada nóserli jańbyrdyń saldarynan 2 adam mert bolyp, taǵy 3-eýi jaraqattandy
ASTANA. 31 shilde. QazAqparat - Elordada nóser jańbyr men qatty jel elordalyqtardyń záre-qutyn aldy. Daýyl saldarynan 2 adam mert bolyp, 3 adam jaraqattandy.
Astana qalalyq tótenshe jaǵdaılar departamentiniń baspasóz hatshysy Bıbigúl Esmaǵanbetovanyń aıtýynsha, qazirgi ýaqytta qala boıynsha 3 tótenshe oqıǵa tirkelgen.
Atap aıtqanda, Abylaı han kóshesi boıyndaǵy turǵyn úıge kran qulaǵan. Abyroı bolǵanda tótenshe oqıǵa saldarynan eshkim zardap shekken joq, tek turǵyn úı aıtarlyqtaı zaqymdandy.
«Qaıǵyly oqıǵa Zarechnyı aýylynda oryn alyp, ókinishke qaraı bir adam qaza tapty. Sonymen qatar «Motıv-NS» JKS-niń aýmaǵynda kran qulap, 1 adam qaza tapty, taǵy eki jumysshy zardap shekti», - dedi.
Onyń atap ótýinshe, 112 qyzmetine qala turǵyndarynan kóptegen qońyraýlar túsýde. «Saǵat 19:00-degi jaǵdaı boıynsha, 70-ten astam qońyraý kelip tústi. Jedel aqparattar óńdelýde, tótenshe oqıǵa ornyna mamandar jiberilýde», - dedi ol.
