ShUǴYL: Astanada «Arqankergen» beketi shekarashylarynyń múrdelerin taný jalǵasýda

Bul týraly búgin QazAqparatqa QR UQK-nyń baspasóz hatshysy Kenjebolat Beknazarov málim etti.

Onyń atap ótýinshe, DNQ-ǵa saraptama jasaý protsesi uzaq ári belgili bir ýaqytty qajet etedi. Osy kúnderi Astanaǵa 14 shekarashynyń týǵan-týystary men jaqyndary kelip, DNQ-ǵa qan tapsyrdy. Ol aıaqtalǵannan keıin jáne DNQ-niń sáıkestigi belgili bolǵannan keıin tolyq aqparat taratylatyn bolady.

Dezoksırıbonýkleın qyshqyly (DNQ) - tiri organızmniń qyzmeti men damýynyń genetıkalyq baǵdarlamasyn júzege asyratyn jáne urpaqtan urpaqqa berilýiniń saqtalýyn qamtamasyz etetin makromalekýla.

QazAqparat tilshileri jarııalanym ádebi men erejesiniń normalaryn saqtaı otyryp, tyńǵylyqty ázirlengen jáne naqty aqparatqa súıenedi, ári «Arqankergen» beketinde qaıǵyly jaǵdaıda mert bolǵan shekarashylardyń ata-analaryna, týǵan-týystaryna, jaqyndaryna, dostaryna shyn kóńilden qaıǵyryp kóńil aıtady.

Esterińizge sala keteıik, QR UQK Shekara qyzmetiniń aqparaty boıynsha, 30 mamyrda QR UQK shekara qyzmetiniń «Shyǵys» óńirlik basqarmasy Úsharal shekara jasaǵy «Sary bókter» zastavasynyń narıady taýda jazǵy ýaqytta 15 shekarashy qyzmet atqaratyn «Arqankergen» shekara beketiniń janyp ketken ǵımaratyn kórgen. Tekserý barysynda janyp ketken 13 adamnyń, onyń ishinde beket janynda ornalasqan ańshylyq sharýashylyǵy qoryqshysynyń máıiti tabyldy. Sál keıinirek taǵy bir jaýyngerdiń múrdesi tabyldy.

Oqıǵa bolǵan jerde shekara qyzmetiniń dırektory general-maıor Nurjan Myrzalıevtiń basshylyǵymen QR Іshki ister mınıstrligi jáne Bas áskerı prokýratýra mamandary men ókilderiniń qatysýymen jedel tergeý toby jumys isteýde. 5 maýsym kúni QR UQK Shekara qyzmetiniń áskerı qyzmetshileri Qazaqstan-Qytaı shekarasyna taıaý mańnan 15-shi jaýyngerdi din aman taýyp, ustady. Oǵan qarýlastaryn óltirdi degen kúdik keltirilip otyr.