ShUǴYL: Astanada 24 jastaǵy jigit tanys áıelin, odan keıin onyń segiz jasar qyzyn býyndyryp óltirdi
ASTANA. 10 qazan. QazAqparat - Astana qalalyq ІІD baspasóz qyzmetinen habarlaǵandaı, 8 qazan kúni burynǵy metall bazasynyń mańynan 25-30 jas aralyǵyndaǵy áıeldiń múrdesi tabyldy.
Aldyn ala tekseris onyń býyndyrylyp óltirilgenin (asfıksııa) aıqyndady. Oqıǵa ornyna tez arada ІІD basshylyǵy men jedel tergeý toby jetti.
Marqumnyń 1978 jyly týǵan B. esimdi Astana qalasynyń turǵyny ekendigi anyqtalǵan soń, polıtsııa qyzmetkerleri onyń turǵylyqty jerine bardy. Jataqhanadaǵy onyń bólmesiniń esigi jabyq bolǵan, alaıda kórshileri túnde azamatsha B.-nyń qyzynyń aıǵaılaǵan daýystaryn estigenin aıtty. Esikti buzyp kirgen tártip saqshylary bólmeden zorlyqpen óltirilgen jasóspirim qyzdyń múrdesin tapty. Bólme ishi astan-kesteń bolǵan.
«Jedel toptar atalǵan qylmysty ashý úshin jedel sharalar qoldandy. Az ýaqyttyń ishinde áıeldiń aty-jóni anyqtaldy. Keshendi jedel izdestirý sharalary barysynda táýlik sońyna qaraı asa aýyr qylmysty jasaǵan qylmyskerdiń de aty-jóni anyqtalyp, artynsha ustaldy. Bultartpas aıǵaqtarǵa qarsy ýáj taba almaǵan qylmysker qylmysyn moıyndap, sondaı-aq jábirlenýshiniń bólmesinen alyp ketken zattardy qaıtardy. Belgili bolǵandaı, ustalǵan azamat elordada buǵan deıin de jasalǵan aýyr qylmystarǵa qatysty bolyp shyqty», - dep habarlady Astana qalalyq ishki ister departamentiniń bastyǵy Amantaı Áýbákirov.
Polıtsııa qyzmetkerleri isti teksere kele, astananyń 24 jastaǵy E. esimdi turǵyny jańadan tanysqan B. esimdi azamatshamen birge kólikpen qydyrýǵa shyqqanyn, sol kezde ekeýiniń arasynda janjal týyndap, nátıjesinde ustalǵan azamat áıeldi uryp-soǵyp, artynsha symmen qylqyndyryp tastaǵanyn anyqtady.
Áıeldiń qyzy ózin tanyp qoıýy múmkin degen qorqynyshpen (óıtkeni ol sheshesiniń kimmen ketkenin kórgen) qylmysker kýágerden de qutylýdy oılaıdy. Áıeldiń qaltasynan kiltin alyp, túndeletip onyń bólmesine keledi. Bólmege kirip, belbeýimen 8 jasar qyzdy býyndyryp óltirip, teledıdar, noýtbýk jáne basqa da zattardy alyp ketken.
Atalmysh fakti boıynsha QR QK 96-baby 2-tarmaǵy boıynsha qylmystyq is qozǵaldy. Ustalǵan azamat Astana qalalyq ІІD-niń ýaqytsha ustaý abaqtysyna qamaldy. Tergeý amaldary júrgizilýde.
