ShUǴYL: «Astana terrorısteriniń» kóshbasshysy 10 jylǵa bas bostandyǵynan aıyryldy
ASTANA. 14 tamyz. QazAqparat - Elordalyq sot memlekettiń joǵarǵy basshylaryna qastandyq jasaýdy jáne Astanada terrorlyq akti uıymdastyrýdy josparlaǵan lańkestik toptyń kóshbasshysyn 10 jylǵa bas bostandyǵynan aıyrý jazasyna kesti. Qalǵan terrorıster 5,5 jyldan 10 jylǵa deıin bas bostandyǵynan aıyrý jazasyn aldy.
Búgin Astana qalasynyń mamandandyrylǵan aýdanaralyq soty lańkestik topqa qatysty úkim shyǵardy. Ony Astana qalasynyń mamandandyrylǵan aýdanaralyq sotynyń tóraǵasy Meıram Janǵuttınov oqydy.
«QR Qylmystyq Kodeksi 58 babynyń 3 tarmaǵyna sáıkes, qylmystardy biriktirýdiń negizinde S.Qoshalaqovqa 10 jyl bas bostandyǵynan aıyrý jáne múlkin tárkileý aqtyq jazasy taǵaıyndalsyn», - dedi M.Janǵuttınov.
Sonymen qatar K.Sháripov - 10 jyl, E.Qadirsizov - 9 jyl qatań rejımdi kolonııada bas bostandyǵynan aıyrý jazasyn aldy. A.K. Qasqabaev pen S.K.Júnisov jalpy rejımdegi kolonııaǵa 6 jylǵa kesildi jáne múlikteri tárkilenedi. B.K. Ábdikerov 5,5 jylǵa bas bostandyǵynan aıyryldy.
Eske sala keteıik, «Astana terrorısterine» qatysty sot protsesi 2013 jyldyń mamyr aıynda bastalǵan bolatyn.
Іs boıynsha 6 adam aıyptalyp otyr: S.A.Koshalakov, A.K. Sháripov , B.K. Ábdikerov, E.E.Qadirsizov, A.K. Qasqabaev, S.K.Júnisov.
Olarǵa jarylǵysh zattardy paıdalana otyryp, jarylysty jáne ózge de áreketterdi jasaý maqsatynda sóz baılasý, terrorıstik topty qurý, qarý jaraq pen oq-dárilerdi jymqyrý jáne basqa da aýyr qylmystar boıynsha aıyptar taǵylyp otyr.
Tergeý málimetterine sáıkes, S.Qoshalaqov lańkestik topty qurǵan. Onyń maqsaty lańkestik aktilerdi jasaý, sondaı-aq óltirý jáne qyzmettik qarýdy ıemdený pıǵylymen quqyq qorǵaý jáne arnaıy qyzmetterdiń qyzmetkerlerine shabýyl jasaýdy uıymdastyrý arqyly Qazaqstan aýmaǵynda Halıfat ıslam memleketin qurý bolǵan.
Tergeý organdarynyń málimetterine sáıkes, qoǵamdyq qaýipsizdikti buzý jáne halyqty qorqytý maqsatynda Qoshalaqovtyń basshylyǵyndaǵy terrorıstik top Beıbitshilik jáne kelisim saraıynda jarylysty, qyzmetkerlerdi óltirý maqsatynda Astanalyq UQD ǵımaratyna shabýyldy, sonymen qatar Qazaqstan Respýblıkasynyń joǵarǵy laýazymdy tulǵalaryna qastandyq jasaýdy uıymdastyrýdy josparlaǵan. Osy maqsatta A. Sháripov óziniń kámeletke tolmaǵan musylman zaıyby Nurǵalıevaǵa keri áser ete otyryp, joǵarǵy laýazymdy tulǵalardyń qatysýymen Astana qalasynda ótetin jańa Opera jáne balet teatrynyń ashylýy barysynda ózin-ózi jarý arqyly ózin qurbandyq etý maqsatynda ony shahıd retinde terrorıstik topqa kirýge daıyndaı bastaǵan.
Astana qalalyq sotynyń baspasóz qyzmetinen málim etkendeı, "astanalyq terrorısterge" qatysty is protsesi jabyq esik jaǵdaıynda ótti.
