ShUǴYL: Astana - Qaraǵandy temirjol torabynda bolǵan apat Almaty, Qaraǵandy, Bishkek jáne Saryaǵashtan keletin 7 jolaýshylar poıyzyn keshiktirdi

ASTANA. 12 jeltoqsan. QazAqparat - Astana-Qaraǵandy temirjol torabynda bolǵan apat 7 jolaýshylar poıyzyn keshiktirgen, dep habarlady Astana vokzalynyń anyqtamalyq bólimshesinen.

«Qazaqstan temir joly» UK» AQ-nyń baspasóz qyzmetinen habarlanǵandaı, búgin saǵat 13.10-da Astana - Qaraǵandy ýchaskesiniń Qaraǵandy jaq bóligindegi Aqtasty-Shoqaı ótkelinde №1626 júk poıyzy qozǵalysynyń 635 shaqyrymynda júk tıelgen 11 vagon joldan shyǵyp ketti. Eki jol boıynsha da qozǵalys jabyldy. Apat oryn alǵan jerde 2 qalpyna keltirý poıyzy jumys isteýde. Mán-jaıdy anyqtaý úshin arnaıy qurylǵan komıssııa oqıǵa ornyna attandy.

Astana temirjol vokzalynyń qyzmetkeri málim etkendeı, poıyzdar shamamen 5 saǵatqa keshigedi. Keshigýshilerdiń ishinde Almaty, Qaraǵandy, Bishkek, Saryaǵash jáne taǵy da basqa baǵyttardan poıyzdar bar. Tolyq aqparatty Astana temirjol vokzalynyń anyqtamalyq qyzmetinen alýǵa bolady.