ShUǴYL: Astana avtobeketinen bomba izdeý barysynda 2 myń adam qaýipsiz jerge kóshirildi
ASTANA. QazAqparat - Elordanyń «Saparjaı» avtobeketi ǵımaratyna bomba qoıylǵandyǵy týraly aqparat túskennen keıin 2 myń adam qaýipsiz jerge kóshirildi, dep habarlady Astana qalalyq ІІD baspasóz qyzmetinen.
30 shilde kúni saǵat 13:31-de belgisiz áıel beketke bomba qoıylǵandyǵyn aıtyp, telefon shalǵan.
«Jarylys» týraly habar kelip túskennen keıin avtobekettiń jumysy toqtatyldy. Ǵımarattan eki myńnan astam adam qaýipsiz jerge kóshirildi, al oǵan japsarlas aımaqtan qalaaralyq qatynasqa shyǵatyn 13 avtobýs pen 12 jeńil kólik shyǵaryldy. «Arlan» arnaıy bólimshesiniń qyzmetkerleri men kınologııalyq ortalyqtyń qyzmettik ıtteriniń kómegimen ǵımarat jáne oǵan japsarlas aımaq jiti tekserildi. Jarylǵysh zat tabylǵan joq», - delingen taratylǵan aqparatta.
Qalalyq ІІD málimetterine qaraǵanda, lańkestik jaıynda jalǵan aqparat bergen Aqmola oblysynyń 25 jastaǵy turǵyny ustalyp, ol óz kinásin moıyndap otyr. «Ustalǵan azamatshanyń aıtýynsha, ol avtobeket ǵımaratynda júrip, lańkestikke qarsy qorǵanys býkletindegi kórsetilgen telefon nómirine qońyraý shalǵan. Osy áreketi arqyly shuǵyl qyzmetterdiń lańkestik jaıyndaǵy aqparatqa qalaı jedel áreket etetindigin tekserip kórmek bolǵan», - dedi vedomstvodan.
Atalǵan fakti boıynsha QR QK 242 baby boıynsha qylmystyq is qozǵaldy. Tergeý amaldary júrgizilýde. Ustalǵan azamatsha Astana qalalyq ІІD-niń ýaqytsha oqshaýlaý abaqtysyna qamaldy. Oǵan keltirilgen materıaldyq shyǵyndy qalpyna keltirý týraly da talap aryz beriletin bolady. Aıta keterligi, mundaı quqyq buzýshylyǵy úshin ol 6 jylǵa deıin bas bostandyǵynan aıyrylýy múmkin.
