ShUǴYL: Astana áýejaıynda Ystambul baǵytyndaǵy ushaqqa bombasy bar jolaýshy mingendigin habarlaǵan er adam ustaldy
ASTANA. 18 qańtar. QazAqparat - Keshe saǵat 19.30-da polıtsııaǵa Ystambul baǵytymen ushyp shyqpaq ushaqtyń bortyna jarylǵysh zatty alyp kirgen jolaýshy týraly aıtqan belgisiz bireýdiń qońyraýy týraly habarlandy.
Bul týraly QR ІІM Kóliktegi ІІD-niń baspasóz qyzmetinen málim etti.
Dabyl boıynsha jelilik polıtsııa bóliminiń jeke quramy kóterildi, oqıǵa ornyna Astana qalasy boıynsha kóliktegi ishki ister departamentiniń, UQK men TJ departamentteriniń, prokýratýra jáne jedel-járdem qyzmetkerleri shyqty.
Polıtsııa qyzmetkerleri 88 jolaýshy men ekıpajdyń 8 múshesin qaýipsiz aýmaqqa shyǵardy, odan keıin áýe kemesi jolaýshylar termınalynan qaýipsiz jerge jetkizildi. «Arlan» arnaıy bólimshesiniń saperlary ushaqtyń bortyn jáne jolaýshylardyń júkterin tekserdi. Jarylǵysh zat tabylmady.
Jedel-izdestirý is-sharasyn ótkizý barysynda kóliktegi polıtsııa qyzmetkerleri jarylǵysh zat týraly óziniń uıaly telefonynan habarlaǵan 42 jastaǵy astanalyq turǵyndy ustady. Kúdikti ýaqytsha oqshaýlaý abaqtysyna qamaldy.
QR QK-niń 242-baby boıynsha (lańkestik aktisi jóninde jalǵan aqparat taratý) qylmystyq is qozǵaldy.
