ShUǴYL: Anar Meshimbaeva 7 jylǵa sottaldy
ASTANA. QazAqparat - Búgin Astanada Esil aýdandyq sotynda 2009 jyly ulttyq sanaqqa bólingen 758 mıllıon teńgeni jymqyrdy dep aıyptalǵan Statıstıka agenttiginiń burynǵy tóraıymy Anar Meshimbaevaǵa qatysty sot úkimi shyqty, dep habarlaıdy «QazAqparat» tilshisi sot zalynan.
Anar Meshimbaeva senip tapsyrylǵan bóten múlikti ysyrap etkeni, sondaı-aq qyzmettik ókilettigin teris paıdalanǵany úshin 7 jylǵa bas bostandyǵynan aıyryldy. Ol óz jazasyn jalpy rejımdegi kolonııada ótkeretin bolady. Sonymen qatar onyń barlyq jekemenshik múlki tárkilenedi. Degenmen, Statıstıka agenttiginiń burynǵy basshysy eki bap boıynsha da kinálaryn moıyndamady.
«QR Qylmystyq Kodeksi 176-babynyń 3-bóliginiń "b", "g" tarmaqtary boıynsha Anar Meshimbaevany senip tapsyrylǵan bóten múlikti ysyrap etti, sondaı-aq qyzmettik ókilettigin teris paıdalandy degen aıyppen Anar Meshimbaevany kináli dep taýyp, ony 7 jylǵa jalpy rejımdegi kolonııada bas bostandyǵynan aıyrý jazasy taǵaıyndalsyn, jekemenshik múlkin tárkileý jáne memlekettik qyzmetke ornalasýǵa 5 jylǵa deıin tyıym salý qarastyrylsyn», - dep kesip aıtty Astana qalasy Esil aýdandyq sotynyń sýdıasy Aqmaral Isaeva.
Anar Meshimbaevaǵa qatysty qozǵalǵan qylmystyq is 2010 jyldyń qańtar aıynda bastalǵan bolatyn. Ol kezde A. Meshimbaeva Qazaqstannan ketip, izin sýytqan. Alaıda tórt jyl salyp, ol Máskeýde ustaldy.
