ShUǴYL: Almatyda «Qulager» bazarynda órt shyqty
ASTANA. 17 qarasha. QazAqparat - Almaty qalasyndaǵy órt qyzmetiniń ortalyq pýnktine «Qulager» bazarynda saýda konteınerleri órtenip jatqany jaıly telefon habarlamasy kelip tústi, dep habarlady QR TJM baspasóz qyzmeti.
Jalyndy aýyzdyqtaýǵa 41 birlik órt sóndirý tehnıkasy jáne 245 adam jumyldyryldy. Sondaı-aq órtti sóndirýge QR TJM «Qazavıaqutqarý» AQ-nyń KA-32 tikushaǵy qatystyrylyp, áýeden órt oshaǵyna 33 tonnadan astam sý shashyldy.
«103» qyzmeti men QR TJM «Apattyq medıtsına ortalyǵy» zardap shekkenderdi qabyldaıtyn medıtsınalyq pýnkt uıymdastyrdy. Almaty qalasynyń ishki ister departamenti №5571 áskerı bólimniń ishki áskerler sarbazdarymen birlesip bazar aýmaǵyn qorshap aldy. «Tazalyq» AQ sý shashatyn mashınalarymen (16 mashına) sý tasý uıymdastyryldy.
Jalyn aýmaǵy 3 myń sharshy metrge jýyq alańdy sharpydy.
Almaty ákimi Ahmetjan Esimov órt bolǵan jerdi tikushaqpen baıqap kórip shyqty. Qala basshysy beıindik basqarmalar men aýdan ákimdikterine jumyssyz qalǵan kásipkerlerdiń naqty sanyn anyqtaýǵa, TJD qyzmetine órttiń sebebin barynsha tezirek anyqtaýǵa jáne onyń saldaryn joıýǵa tapsyrma berdi. Sonymen birge, Ahmetjan Esimov ámbebap polıtsııaǵa oqıǵa ornynda qoǵamdyq tártipti saqtaýdy jáne tonaýshylyqqa jol bermeýdi tapsyrdy.
Almaty qalasynyń tótenshe jaǵdaılar departamenti tekserý júrgizý úshin tergeý tobyn qurdy. Órttiń shyǵý sebepteri anyqtalýda.
