ShUǴYL: Almatyda bir júrgizýshiniń kesirinen 3 adamnyń ómiri qıyldy
ALMATY. 21 mamyr. QazAqparat - Almatyda bir júrgizýshiniń qylmystyq selqostyǵy 3 adamnyń ólimine ákep soqtyrdy, dep habarlady Almaty ІІD-niń baspasóz qyzmeti.
Apat qala ortalyǵynda keshke qaraı oryn aldy.«Daımler Bents-500» markaly kóliktiń júrgizýshisi qarsy baǵytqa shyǵyp ketip, qatarynan eki kólikpen soqtyǵysty. Aldymen ol joldyń shetinde turǵan «Mazda-323» kóligine baryp soǵyldy, onyń ishinde 3 jolaýshy - er adam men 2 áıel bolǵan. «Daımler» kóliginiń jyldamdyǵy joǵary bolǵandyǵy sonshalyq, ol qarsy kele jatqan taǵy da bir «Mazda-626» kóligimen soqtyǵysty. Abyroı bolǵanda bul kóliktiń ishinde júrgizýshiden basqa eshkim bolmady. «Mazda-626»-nyń júrgizýshisi jaraqattanǵan joq. Jábir kórgenderdiń barlyǵy aýyr jaǵdaıda aýrýhaǵa jetkizildi. Alaıda 3 jolaýshy tań ata kóz jumdy», - dedi Almaty ІІD jol polıtsııa basqarmasy basshysynyń orynbasary, polkovnık Turyshan Matqulov.
Polıtsııa qyzmetkerleri jaǵdaıdy tekserý barysynda tek bir jolaýshynyń jeke tulǵasyn anyqtady. Ol 28 jastaǵy - almatylyq azamat. Onyń janynda bolǵan áıelderdiń jeke qujattary bolmady. Boljam boıynsha olardyń bireýi 20-25-te, ekinshisi shamamen 30-35 jasta, júktiliktiń 6 aıynda bolǵan. «Mazda-323» markaly kóliktiń jambas súıekteri synǵan júrgizýshisi aýrýhanada em qabyldaýda. Jol-kólik apatyna kináli azamat aýyr jaraqattarmen aýrýhanaǵa jetkizildi.
«Qaıǵyly oqıǵa «Daımler Bents» markaly kóliktiń 32 jastaǵy júrgizýshisiniń qylmystyq selqostyǵynan boldy. Ol kólikke mas kúıinde otyryp, jol erejesin óreskel buzǵan. Bul kólik Qyrǵyzstannyń memlekettik nómirinde bolǵandyqtan, Almatynyń jol polıtsııa organynda tirkelmegen. Barlyq kólikterdiń jyldamdyǵyn baqylaıtyn organnyń arnaıy málimetter bazasynda bul kólikke qatysty eshqandaı aqparat joq. Sondaı-aq bul kólik Almatyda tehnıkalyq baqylaýdan ótpeýi múmkin», - dedi polkovnık Matqulov.
