ShUǴYL: Almaty oblysynda lańkestik uıymnyń bes múshesiniń kózi joıyldy - QR Bas prokýratýrasy
ASTANA. 4 jeltoqsan. QazAqparat /Marlan Jıembaı/ - Almaty oblysynda lańkestik uıymnyń bes múshesiniń kózi joıyldy. Bul týraly búgin QR Bas prokýratýrasynyń resmı ókili Nurdáýlet Súıindikov málim etti.
«Keshe, 2011 jyldyń 3 jeltoqsanynda Almaty oblysy Іle aýdanynyń Boraldaı kentinde lańkestik toptyń qyzmetine tosqaýyl qoıyldy. Top músheleri 2011 jyldyń 8 qarashasynda eki polıtsııa qyzmetkerin óltirip, Almaty qalasynda jańa zorlyq-zombylyq áreketterin iske asyrýdy josparlaǵan.
Top jetekshisi 1977 dúnıege kelgen Aǵjan Hasen 2011 jyldyń 28 qazanynan beri Qazaqstan Respýblıkasy Qylmystyq Kodeksiniń 233-2-baby (lańkestik top qurý, oǵan basshylyq etý jáne onyń qyzmetine qatysý) boıynsha qozǵalǵan qylmystyq istiń aıasynda quqyq qorǵaý organdarynyń izdeýinde júrgen bolatyn», -dedi ol.
Onyń atap ótýinshe, aǵymdaǵy jyldyń 3 jeltoqsanynda jedel-izdestirý sharalary barysynda toptyń kóshbasshysy jáne birqatar músheleri Boraldaı kentinde tabylǵan. Ustaýǵa áreket jasaǵan kezde qylmyskerler belsendi qarýly qarsylyq kórsetken.
«Arnaıy operatsııa barysynda Ulttyq qaýipsizdik komıteti «Arystan» qyzmetiniń arnaıy bólimshesiniń eki qyzmetkeri jaralanyp, qaza tapty», dedi resmı ókil.
N.Súıindikovtiń atap ótýinshe, qylmyskerler atalǵan poselkeniń Shpak kóshesi, 43 meken-jaıyndaǵy turǵyn úıde jasyrynyp, olardy ulttyq qaýipsizdik organdary men Almaty qalalyq jáne oblystyq ishki ister organdarynyń arnaıy bólimsheleri qorshaýǵa alǵan. Tez arada, bekitilgen tártip boıynsha kórshiles úılerdiń jergilikti turǵyndary qaýipsiz aýmaqqa shyǵarylyp, aýdandy oqshaýlaý uıymdastyryldy, apattyq-qutqarý jáne medıtsınalyq qyzmetteri tartyldy.
«Erikti túrde berilýden bas tartqan soń jáne kórsetilgen qarýly qarsylyqqa jaýap retinde olardyń jetekshisin qosa alǵanda lańkestik toptyń bes múshesi joıyldy. Qylmyskerler jasyrynǵan úıden eki RGD-5 granatasy, eki-ekiden Kalashnıkov avtomaty men Makarov tapanshasy tabyldy. Azamattyq turǵyndar arasynda qaza bolǵandar men jaralanǵandar joq. Arnaıy operatsııa 2011 jyldyń 3 jeltoqsany kúni 23 saǵat 50 mınýtta aıaqtaldy», dedi ol.
Resmı ókildiń aıtýynsha, oqıǵa ornynda jedel-tergeý is-sharalary jalǵasýda, Qazaqstan Respýblıkasy Qylmystyq Kodeksiniń 96 (adam óltirý), 251 (qarýdy, oq-dárilerdi, jarylǵysh zattardy jáne jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý), 237 (bandıtızm) baptary boıynsha qylmystyq ister qozǵaldy.
Oqıǵa ornyn muqııat tekserý jáne lańkesterdiń máıitterin anyqtaý jumystary júrgizilýde. Qazirgi ýaqytta Almaty qalasy men Almaty oblysynyń quqyq qorǵaý organdary qyzmet atqarýdyń kúsheıtilgen rejımine kóshirildi, jaǵdaı tolyq baqylaýda. Turǵyndarǵa qaýiptenýge jáne mazasyzdanýǵa negiz joq. Tergeýdiń nátıjeleri jáne qabyldanǵan sharalar týraly qosymsha habarlanatyn bolady», - dedi N.Súıindikov.
