ShUǴYL: Aqmola oblysyndaǵy iri jol-kólik apatyna kúdikti qamaýǵa alyndy degen aqparatty onyń advokaty joqqa shyǵardy
ASTANA. 24 tamyz. QazAqparat - Aqmola oblysyndaǵy iri jol-kólik apaty boıynsha kúdiktini qamaýǵa alýǵa Arshaly aýdandyq sotynyń sýdıasy sanktsııa bergen joq. Bul jaıynda QazAqparatqa atalǵan kúdiktiniń advokaty Tolybaı Teńizbaev habarlady.
Esterińizge sala keteıik, 19 tamyzda bolǵan apattyń saldarynan 16 adam qaza boldy.
Qorǵaýshynyń sózine qaraǵanda, 34 jastaǵy Dmıtrıı Kozlov esimdi kúdiktige atalǵan jol-kólik oqıǵasynan keıin jasalǵan otadan soń ol esin jıdy. Onyń jaǵdaıynyń nasharlanýyna qater joq. Alaıda ony tasymaldaýǵa múmkin emes jáne osyǵan baılanysty D. Kozlov sotqa da kelýge qaýqarsyz.
Budan buryn habarlanǵandaı, qazirgi kezde D.Kozlov aýrýhanada jatyr. Ony saqshylar kúzetip otyr. Jol-kólik apatyna kináli degen kúdikpen D.Kozlovqa qatysty eki qylmystyq is qozǵaldy. Birinshisi, QR Qylmystyq kodeksiniń 296-baby - eki jáne odan da kóp adam ólimine ákelip soqtyrǵan jol júrý erejelerin buzý áreketi, ekinshisi, 297-bap - oqıǵa bolǵan jerden qashyp ketý. Alaıda, T. Teńizbaev D. Kozlovtyń apat ornynan qashyp ketti degenge kelispeıtindigin aıtyp otyr.
Aıta keteıik, búgin keıbir buqaralyq aqparat quraldarynda kúdikti atalǵan is boıynsha qamaýǵa alyndy degen habar tarady.
