ShUǴYL: Ábilázovtiń uıymdasqan qylmystyq tobynyń eki belsendi qatysýshysy Qazaqstanǵa ekstradıtsııalanady - QR Qarjy polıtsııasy
ASTANA. 21 tamyz. QazAqparat - Qarjy polıtsııasy Ábilázovtiń uıymdasqan qylmystyq tobynyń basshylary men belsendi qatysýshylaryn Qazaqstanǵa qaıtarý boıynsha jumysyn jalǵastyrýda, dep habarlady vedomstvonyń baspasóz qyzmetinen.
Uıymdasqan qylmystyq top qurý jáne onyń qyzmetine qatysý, sondaı-aq BTA Bankiniń aqshalaı qarajatyn urlaý jáne zańsyz paıdalaný aıyptarymen halyqaralyq izdeýge jarııalanǵan BTA Bank korporatıvtik bıznesi №6 basqarmasynyń burynǵy bastyǵy Efımova Veronıkanyń Qazaqstanǵa ekstradıtsııalanýy kútilýde.
Qylmystyq is materıaldary boıynsha V.Efımova M.Ábilázov basqarǵan qylmystyq toptyń basty uıymdastyrýshylarynyń biri bolǵan.
Ol 2005-2009 jyldary Ábilázovtiń uıymdasqan qylmystyq tobynyń baqylaýyndaǵy kompanııalarǵa nesıelerdi rásimdeý arqyly Bankiniń aqshalaı qarajatyn urlaý úshin aıryqsha ýákilettikterge ıe bolǵan BTA Bankiniń korporatıvtik bıznestiń №6 basqarmasynyń bastyǵy bolǵan.
2009 jylǵy 11 naýryzda Efımovany qamaýǵa alý syrttaı sanktsııalandy, al 17 naýryzda ol halyqaralyq izdeýge jarııalandy.
2009 jylǵy 3 shildede Efımova Máskeý qalasynda ustaldy.
2010 jylǵy 21 sáýirde Reseı Federatsııasynyń Bas prokýratýrasy Efımovany qylmystyq jaýapkershilikke tartý úshin Qazaqstan Respýblıkasyna ekstradıtsııalaý týraly sheshim qabyldady.
Efımova bul sheshimge birneshe ret shaǵym túsirdi. Alaıda ár túrli deńgeıdegi sottarmen, onyń ishinde Reseı Federatsııasynyń Joǵarǵy Sotynyń Sot alqasymen bul shaǵymdardy qanaǵattandyrýdan bas tartý týraly sheshimder shyǵaryldy.
Osydan keıin Efımova Adam quqyqtary jónindegi Eýropa sotyna júgindi. Bul sot ta Efımovany Qazaqstan Respýblıkasyna ekstradıtsııalaǵan jaǵdaıda onyń quqyqtary buzylmaıtyndyǵy týraly sheshim shyǵardy.
Jaqyn ýaqytta Efımova Qazaqstanǵa ekstradıtsııalanatyn bolady.
Oǵan qosa, Qarjy polıtsııasy agenttigi Qazaqstan Respýblıkasynyń Bas prokýratýrasy arqyly BTA Bankiniń korporatıvtik bıznestiń №6 basqarma bastyǵynyń orynbasary bolǵan Júnisova (Aqpenbetova) Záýrege qatysty ekstradıtsııalyq materıaldardy Vengrııaǵa joldady.
Ol 2009 jylǵy sáýirde BTA Bankiniń aqshalaı qarajatyn urlady jáne zańsyz jolmen tabylǵan aqshalaı qarajat pen ózge de múlikti zańdastyrdy degen aıyppen halyqaralyq izdeýge jarııalanǵan bolatyn.
Tergeýdiń paıymdaýynsha ol, 2005-2009 jyldary BTA Bankiniń korporatıvtik bıznestiń №6 basqarma bastyǵynyń orynbasary bola tura, Ábilázovtiń uıymdasqan qylmystyq tobyna táýeldi Qazaqstan Respýblıkasynyń rezıdentteri bolyp tabylatyn zańdy tulǵalardy jáne offshorlyq kompanııalardy qurýmen, olarǵa basshy, quryltaıshy bolatyn adamdardy izdeýmen aınalysqan.
2013 jylǵy 23 shildede Júnisova (Aqpenbetova) Vengrııada ustaldy.
Jaqyn ýaqytta Vengrııanyń ýákiletti organdarymen Júnisovany Qazaqstan Respýblıkasyna ekstradıtsııalaý týraly máseleniń qaralýy kútilýde.
