Shuǵyl aýystyrý qajet: Úkimet 350 myń turmystyq gaz ballonyna qatysty sheshim jasady
ASTANA. KAZINFORM — Búgin Úkimet otyrysynda Premer-mınıstr Oljas Bektenov Energetıka mınıstrligine qoldanystaǵy gaz ballondaryn jańartýdyń tetigin ázirleýdi tapsyrdy.
- Ótken jylý berý maýsymynda gaz ballondarynyń jarylýyna baılanysty 7 oqıǵa tirkeldi. Negizgi sebep olardy paıdalaný kezinde qaýipsizdik talaptarynyń buzylýy boldy. Búginde 350 myńǵa jýyq turmystyq gaz ballony 40-50 jyldan beri paıdalanylyp keledi. Olardy shuǵyl aýystyrý qajet. Ónerkásip mınıstrligine ballondar óndirisin jolǵa qoıý tapsyrylǵan bolatyn. Qazirgi ýaqytta Kókshetaý qalasynda osyndaı zaýyt iske qosyldy. Aldaǵy ýaqytta Atyraý jáne Almaty qalalarynda da ashý kózdelip otyr. Endigi kezekte jeke turǵyn úılermen qatar, tamaqtaný oryndarynda da gaz ballondaryn aýystyrý jumystaryn jolǵa qoıý kerek, - dedi O. Bektenov.
Sonymen qatar Premer-mınıstr búginge deıin turmystyq ballondardy aınalymnan alyp, kádege jaratý tártibi rettelmegenin aıtty.
- Energetıka mınıstrligine múddeli memlekettik organdarmen birlesip, bir aı ishinde barlyq óńirlerdegi qoldanystaǵy gaz ballondaryn jańartý men aınalymnan alýdyń, sondaı-aq baqylaýdyń naqty tetigin ázirleýdi tapsyramyn. Ákimdikter bul jumystyń jergilikti jerlerde iske asyrylýyn baqylaýǵa alsyn, - dedi Úkimet basshysy.
Buǵan deıin habarlanǵandaı, Qazaqstanda turmystyq gaz ballondaryna mindetti tańbalaý engiziledi.