Shýdyń sýyn eshkim buryp alǵan joq – mınıstrlik depýtat saýalyna jaýap berdi

ASTANA. KAZINFORM – Sý resýrstary jáne ırrıgatsııa mınıstrligi Májilis depýtaty Maqsat Tolyqbaıdyń áleýmettik jelide qyzý talqyǵa túsken depýtattyq saýalyna jaýap berdi.

Depýtat óz saýalynda Jambyl oblysynda Shý ózeniniń sýyn ózine buryp alǵan fazenda ıesine jergilikti ákimdik pen Sý resýrstary jáne ırrıgatsııa mınıstrligi eshteńe isteı almaı otyrǵanyn aıtqan.

Mınıstrlik Moıynqum aýdanyń ákimdiginiń bergen málimetin alǵa tartyp, depýtat keltirgen málimettiń bárin teriske shyǵaryp otyr.

- Moıynqum aýdany ákimdiginiń aqparatyna sáıkes, Moıynqum aýdany aýmaǵynda ózen mańaıynda 68 shaǵyn sharýa qojalyǵy jáne eki iri JShS bar. Olarda tıisinshe 5800 jáne 1700 bas iri qara mal ustalady. Ózen arnasyn óz betimen burý faktileri bolmaǵan jáne barlyq sýarmaly alqaptar sý sharýashylyǵy lımıtteri men ruqsattalǵan tártipke sáıkes sýmen qamtamasyz etiledi, - dep jazylǵan jaýapta.

Mınıstrlik mamandary Shýdyń sýyn memleket qalaı rettep otyrǵanyna keńinen túsinikteme bergen.

- Shý ózeniniń alǵashqy tabıǵı taramdanǵan bóligi Moıynqum aýdanyndaǵy Radaı ózegi bolyp esepteledi. Munda sý aldymen keń aýmaqqa jaıylady. Bul tabıǵı fıltratsııa men sýdyń sińirilýin qamtamasyz etedi. 2024 jyldyń qarasha aıynda sý kólemi 120 m³/sek deńgeıine deıin kóterilgen kezde muz Radaı arnasyndaǵy bógetti jyryp ótken. Sonyń saldarynan 2024 jyldyń 23 jeltoqsanynda Moıynqum men Qylyshbaı aýyldaryn sý basý qaýpi týyndap, tótenshe jaǵdaı jarııalanǵan bolatyn. Osyǵan baılanysty sý kólemi birtindep tómendetilip, 2025 jyldyń 17 qańtarynda 90 m³/sek deńgeıinde turaqtandyryldy, - delingen mınıstrlik jaýabynda.

Jaýaptaǵy málimetke sensek, Radaı ózegine sýdy molynan jiberý tasqyn qaýpin týyndatýy múmkin.

- Osy oqıǵalar eskerilip, 2025 jyly Radaı ózeginiń basyna sý rettegish qurylǵy ornatý týraly sheshim qabyldandy. ıAǵnı, Radaı ózegine kóp mólsherde aǵyn sý jiberý qaýipti. Bul qurylǵy – sýdyń tabıǵı aǵysyn kezeń-kezeńimen, qaýipsiz jáne tıimdi basqarýǵa, ıaǵnı sýdy Shý ózeniniń negizgi arnasymen jiberip, Sozaq aýdanyna sýdy jetkizý ýaqytyn azaıtýǵa baǵyttalǵan. Qazirgi ýaqytta ákimdik tarapynan jobalyq-smetalyq qujattamasy ázirlenýde. Tasótkel sý qoımasynan 75 m³/sek sý jáne Fýrmanov sý torabynan Qoraǵaty ózeniniń sýyn qosa alǵanda 85 m³/sek sýdy 1 mamyrǵa deıin jiberý týraly kelisildi. Qazirgi tańda bul baǵyttaǵy jumystar júzege asyrylyp jatyr, - dep jazady mınıstrliktegiler.

Buǵan deıin Ertis ózenine jiberiletin sýdyń kólemi byltyrǵydan az bolatyny aıtylǵan edi.