Shýda 9 jasar eki balany zorlady degen kúdikti meshit qyzmetkeri emes – QMDB

NUR-SULTAN. QazAqparat – Jambyl oblysynda eki jetkinshekke jynystyq zorlyq-zombylyq kórsetti degen aıyppyn ustalǵan kúdiktiniń meshit qyzmetine qatysy joq, dep habarlaıdy QazAqparat tilshisi Qazaqstan musylmandary dinı basqarmasynyń Jambyl oblysy boıynsha ókildiginiń baspasóz qyzmetine silteme jasap.

«Jańalyqtarda jasóspirimderge jynystyq zorlyq-zombylyq kórsetti degen aıyptyny ımamnyń kómekshisi dep jatyr. Kúdikti Jambyl oblysy Shý aýdany Birlik aýylynda 1992 jyly dúnıege kelgen, esh jerde jumys istemeıdi. Atalǵan aýyl turǵynynyń meshitke keıde kelip júrgeni bolmasa, meshittiń dinı rásimderine qatysy joq. Jambyl oblysynda meshit qyzmetkeri retinde tirkelmegen», - delingen aqparatta.

Osy oraıda Qazaqstan musylmandary dinı basqarmasynyń Jambyl oblysy boıynsha ókildigi meshitke túrli adamdardyń kelip-ketetinin eske salady.

«Oblystyq «Hıbatýlla Tarazı» meshiti BAQ-tyń joǵaryda atalǵan aýyl turǵynyn meshit kómekshisi dep aıtqany shyndyqqa janaspaıtyndyǵyn málimdeıdi. Nur-Sultan qalasy 2019 jyly 23 qazanda jaryq kórgen «QMDB qurylymyndaǵy dinı laýazymdar tizilimi jáne mindetteri erejesine sáıkes «meshit kómekshisi» degen laýazym joq», - deıdi atalǵan vedomstvodan.

Aıta ketsek, keshe Shýda 9 jasar eki balaǵa jynystyq zorlyq-zombylyq jasady degen kúdikti ustaldy.

Taratylǵan aqparatqa sáıkes, 30 jastaǵy aıypty 9 jastaǵy eki jetkinshekti uzaq ýaqyttan beri zorlap kelgen.