Şýchınskidegi jarylysqa baılanysty qylmystyq is qozǵaldy
ASTANA. KAZINFORM — Qylmystyq is Qylmystyq kodekstiń 292-baby, 3-tarmaǵyna saı, ıaǵnı órt qaýipsizdigi talaptaryn buzý saldarynan eki nemese odan da kóp adamnyń ólimine ákep soqqan is-áreket boıynsha qozǵaldy.
Qazir bul iske qatysty tergeý júrip jatyr. Al Aqmola oblystyq TJD habarlaǵan sońǵy málimetke sensek, Şýchınskidegi kafede gaz-aýa qospasy jarylysy saldarynan 7 adam qaza tapqan. Sondaı-aq 28 azamat jaralanyp, olardyń 13-i aýrýhanaǵa jetkizilgen. Sonyń ishinde 8-i medıtsınalyq kómek kórsetilgen soń, úıine jiberildi. Budan bólek oqıǵa ornynda 10 kisi qutqarylǵan.
— Órt sóndirýshiler jedel qımyldap, otqa oranǵan dámhanadan árqaısysy 50 lıtrlik 5 gaz ballonyn jáne 2 ottegi ballonyn shyǵardy. Sonyń arqasynda nysanda qaıta jarylys bolýynyń aldyn aldy. Oqıǵanyń sebebi men mán-jaıy anyqtalyp jatyr, — delingen vedomstvo habarlamasynda.
Sonymen birge, Aqmola oblystyq TJD atalǵan jaıtqa qatysty 8 (7162) 514-298 nómiri boıynsha ashylǵan jedel jeli jumys istep turǵanyn málimdedi.
Aıta keteıik, buǵan deıin Şýchınskidegi kafede gaz qospasy jarylǵany jóninde jazǵanbyz.
Sonymen qatar, jarylystan zardap shekken 5 adam Kókshetaý aýrýhanasyna aýystyrylǵanyn habarlaǵanbyz.