Şýchınskidegi jarylys: oqıǵa qalaı órbidi
ASTANA. KAZINFORM – Aqmola oblysy Býrabaı aýdanynyń Şýchınsk qalasyndaǵy «Tsentr plova» dámhanasynda bolǵan gaz-aýa qospasynyń jarylýy saldarynan 28 adam zardap shegip, 7 adam qaza tapty. Kazinform tilshisi oqıǵanyń hronologııasyn jasady.
26 aqpan, 21.56
112 pýltine bes qabatty turǵyn úıge japsarlas ornalasqan dámhanada gaz-aýa qospasynyń jarylǵany jáne órt shyqqany týraly habarlama tústi. Áleýmettik jelilerde taraǵan beınejazbadan jarylys sáti anyq kórinedi. Jarylystan keıin birneshe adam ǵımarattan shyǵyp úlgergenimen, basqalary ishinde qalǵan.
TJM Órtke qarsy qyzmet komıtetiniń tóraǵasy Erlan Tóregeldıevtiń aıtýynsha, oqıǵa ornyna órt sóndirýshiler bes mınýt ishinde jetken.
26 aqpan, 22.01
– Alǵashqy órt sóndirý bólimsheleri 5 mınýt ishinde keldi. Dámhana ǵımaraty tolyqtaı ashyq jalynǵa oranǵany anyqtaldy. Syrtqy qabyrǵalar men ishki qalqalar qulaǵan. Alǵashqy áreketter barysynda 10 adam qutqaryldy. Sonymen qatar 50 lıtrlik 5 gaz ballony shyǵaryldy. Bul qaıtalama jarylystardyń aldyn alýǵa múmkindik berdi, – dedi Erlan Tóregeldıev.
Alǵashqy málimetter boıynsha, 6 adamnyń qaza tapqany aıtyldy.
Dál osy ýaqytta jedel járdem brıgadalary da jetti. Aqmola oblystyq densaýlyq saqtaý basqarmasynyń basshysy Narıman Ermek oqıǵa ornyna oblystyq stantsııanyń jáne jergilikti medıtsınalyq uıymdardyń barlyq jedel járdem brıgadalary jumyldyrylǵanyn aıtty.
Sondaı-aq Birjan sal, Shortandy, Makınsk aýdandaryndaǵy medıtsına mekemeleri de tartylǵan.
Keıin naqtylanǵan málimet boıynsha, 28 adam zardap shekken, 7 adam qaza tapqan. Onyń beseýi jedel járdem kelgenge deıin kóz jumǵan. Eki naýqas jansaqtaý bólimine túsken sátte qaıtys bolǵan.
Tórt naýqas Şýchınsk aýdandyq aýrýhanasynyń jansaqtaý bóliminde jatyr, jaǵdaıy óte aýyr, tasymaldaýǵa kelmeıdi. Úsh naýqas travmatologııa bóliminde em qabyldaýda. Taǵy segiz adam ambýlatorlyq em alýda.
Eń jas qaza tapqan – 15 jastaǵy qyz, ol dámhanada ydys jýýshy bolyp jumys istegen. Zardap shekkenderdiń basym bóligi – jastar, eń úlkeni 45 jasta.
– Negizgi jaraqattar – kúıikter. Patsıentterdiń 50%-ynda bet pen aıaq-qol kúıigimen qatar joǵarǵy tynys joldarynyń ıngalıatsııalyq kúıikteri bar. Bul olardyń jaǵdaıynyń aýyrlyǵyn kúsheıtedi. Ambýlatorlyq em alyp jatqan segiz adamnyń ekeýinde qulaq pen bet kúıigi bar, qalǵandarynda jeńil kúıik pen shok jaǵdaıy tirkelgen, – dedi Narıman Ermek.
Keıin úsh naýqasty Astanadaǵy Ulttyq shuǵyl medıtsına úılestirý ortalyǵyna aýystyrý máselesi qaraldy.
Jarty saǵattan keıin
Jarylysty mańaıdaǵy turǵyndar da estigen. Kýáger Dosbolat Daýylbaı jarylystan keıin 30-40 mınýttan soń barǵanyn aıtty. Onyń aıtýynsha, ǵımarat tolyq janyp ketken, qutqarýshylar máıitterdi alyp shyqqan, órt sóndirýshiler asúı jaǵyndaǵy otty elektr symdarynyń úzilýi saldarynan birden óshire almaǵan.
Şýchınsk turǵyny Aıǵanym Dosymbek sol keshte atalmysh dámhanaǵa barýdy josparlaǵan, alaıda sońǵy sátte raıynan qaıtqan.
27 aqpan, 02.11-02.26
Aqmola oblysy ákiminiń orynbasarlary Eldos Ramazanov pen Altynaı Ámrenova alty aýyr naýqasty sanıtarlyq avıatsııa arqyly oblystyq kópsalaly aýrýhanaǵa jetkizý týraly málimdedi. Keıin olar jansaqtaý bólimine jatqyzyldy.
– Patsıentterdiń jaǵdaıy aýyr. Kúıik kólemi 30%-dan 80%-ǵa deıin. Qazirgi ýaqytta kúıiktik shokpen kúres júrgizilýde, – dedi oblystyq aýrýhananyń hırýrgııalyq qyzmet jónindegi dırektordyń orynbasary Dmıtrıı Chaıkov.
27 aqpan, túske qaraı
Býrabaı aýdanynyń ákimi Araı Sadyqov qaza tapqandardyń otbasylaryna 2 mln teńgeden, zardap shekkenderge 1 mln teńgeden birjolǵy materıaldyq kómek beriletinin habarlady. Ákimdik jerleý rásimderin uıymdastyrý shyǵyndaryn óz moınyna alǵan. Sondaı-aq týystaryn ornalastyrý jáne súıemeldeý máseleleri sheshilgen.
Ákimniń málimetinshe, 2022 jylǵa deıin nysan dúken bolǵan, keıin dámhana retinde qaıta tirkelgen. 2023 jyly barlyq qujattary rásimdelgen.
Keıin Aqmola oblysy boıynsha Memlekettik eńbek ınspektsııasy departamenti oqıǵa ornynda arnaıy tergeý bastalǵanyn málimdedi. Aldyn ala derek boıynsha, qaza tapqandardyń beseýi jáne zardap shekkenderdiń segizi dámhana qyzmetkerleri.
Oqıǵa faktisi boıynsha qylmystyq is qozǵaldy.