Şýchınskidegi jarylys: dárigerler zardap shekkenderdiń jaǵdaıy týraly aıtty

KÓKShETAÝ. KAZINFORM – Aqmola oblysynyń densaýlyq saqtaý basqarmasynyń basshysy Narıman Ermek Şýchınsk qalasyndaǵy «Tsentr plova» kafesinde bolǵan órtten keıin aýrýhanaǵa túsken naýqastardyń emdelý barysy týraly aıtyp berdi,

Oblystyń bas dárigeriniń aıtýynsha, tańerteń ol Aqmola oblysynyń ákimi orynbasary Altynaı Amrenovamen birge kópsalaly oblystyq aýrýhanadaǵy naýqastardy aralaǵan. 

Patsıentterdiń jaǵdaıy aýyr bolǵanymen, turaqty. Keıin ol tórt aýyr naýqas jatqan «Avıtsenna Býrabaı» JShS aýrýhanasyna barǵan.

Tragedııadan zardap shekken barlyq adamǵa táýlik boıy kómek kórsetilip jatyr.

— Munda taǵy 4 naýqas jasandy ókpe jeldetý apparatynda jatyr. Ekeýiniń jaǵdaıy asa aýyr. Sonymen birge, barlyq kúsh-jiger jumsalyp, kómek kórsetilip jatyr. Astanadan anestezıolog-reanımatologtar, efferentologtar keldi, olar qazir gemofıltratsııa protsedýrasyn júrgizip jatyr, — dedi ol.

Barlyq qajetti shyǵyn materıaldary, dári-dármekter, preparattar jáne kerek-jaraqtar bar.

— Biz qazir qarap shyqtyq, bári jetkilikti mólsherde. Kómek tolyq kólemde kórsetilip jatyr jáne Aqmola oblysy ákimdigi men Densaýlyq saqtaý mınıstrliginiń baqylaýynda, — dedi oblystyń bas dárigeri.

Eske salaıyq, buǵan deıin Şýchınskidegi dámhanada gaz jarylysy saldarynan alty adamnyń qaza tapqany habarlanǵan edi.

Keıin qaza tapqandar sany jetige jetti. Oqıǵa faktisi boıynsha qylmystyq is qozǵaldy.

Sonymen qatar Şýchınskidegi órtten qaza tapqandardyń otbasyna 2 mln teńgeden tólendi.