Şýchınskidegi jarylys: 12 adam qaza tapqan oqıǵa boıynsha apellıatsııalyq sot sheshim shyǵardy
ASTANA. KAZINFORM — Aqmola oblystyq soty Şýchınskidegi «Palaý ortalyǵy» kafesinde bolǵan jarylysqa qatysty birinshi satydaǵy sot úkimin negizinen ózgerissiz qaldyrdy.
Sýdıa Áskerbek Jaqýlın tóraǵalyq etken sot alqasy úkimniń sıpattaý-ýájdeý bóligine ǵana túzetý engizdi.
Şýchınskidegi «Palaý ortalyǵy» kafesinde gaz ben aýa qospasy jarylyp, 12 adam qaza taýyp, taǵy 11 adam zardap shekken edi. Osy oqıǵaǵa qatysty is Aqmola oblystyq sotynda apellıatsııalyq tártippen qaraldy.
Sot otyrysynda prokýror aıyptaýshy taraptyń birinshi satydaǵy sot úkimimen jalpy kelisetinin aıtty. Alaıda janarmaı quıý stantsııasynyń ıesi men gaz jetkizýshiniń jaýapkershiligin aýyrlatatyn mán-jaılar úkimnen alynyp tastalǵandyqtan, apellıatsııalyq ótinish berilgen.
Prokýror atalǵan mán-jaılardy úkimniń sıpattaý-ýájdeý bóliginde kórsetýdi surady.
Sonymen qatar aıyptaýshy tarap kafe ıesine qatysty úkimde jarylystyń saldary durys kórsetilmegenin atap ótti. Birinshi satydaǵy sot úkiminde 12 adamnyń qaza tapqany jáne 11 adamnyń densaýlyǵyna aýyr zııan kelgeni jazylǵan. Alaıda 11 adam jaraqat alǵanymen, olardyń segiziniń ǵana densaýlyǵyna aýyr zııan kelgen.
Osyǵan baılanysty prokýror sottalýshy advokatynyń úkimniń sıpattaý bóligin naqtylaý týraly ótinishin qoldady. Al jábirlenýshilerdiń talap aryzdaryn ózgertý týraly ótinishterin qanaǵattandyrmaýdy surady.
Sot alqasy Býrabaı aýdandyq sotynyń úkimine ózgeris engizdi. Atap aıtqanda, úkimdegi «11 adamnyń densaýlyǵyna aýyr zııan keldi» degen málimet túzetilip, onyń ornyna «11 adam ártúrli dárejede jaraqat aldy, onyń ishinde segiz adamnyń densaýlyǵyna aýyr zııan keldi» dep kórsetildi.
Úkimniń qalǵan bóligi ózgerissiz qaldyryldy.
Apellıatsııalyq sottyń qaýlysy jarııalanǵan sátten bastap zańdy kúshine endi. Degenmen sot protsesine qatysýshylar bul sheshimmen kelispese, kassatsııalyq satyǵa júgine alady.
Eske salaıyq, buǵan deıin Býrabaı aýdandyq soty «Palaý ortalyǵy» kafesiniń ıesin QR Qylmystyq kodeksiniń 292-babynyń 3-bóligi boıynsha kináli dep tanyp, jeti jylǵa bas bostandyǵynan aıyrǵan edi. Ol órt qaýipsizdigi talaptaryn buzyp, abaısyzda aýyr zardaptarǵa, adamdardyń densaýlyǵyna aýyr zııan kelýine jáne ekiden kóp adamnyń qaza tabýyna sebep bolǵan. Sondaı-aq oǵan úsh jyl boıy qoǵamdyq tamaqtandyrý salasynda qyzmet atqarýǵa tyıym salyndy.
Janarmaı quıý stantsııasynyń dırektory QR Qylmystyq kodeksiniń 306-babynyń 3-bóligi boıynsha kináli dep tanylyp, jeti jylǵa sottaldy. Ol tutynýshylardyń ómiri men densaýlyǵyna qaýipsizdik talaptaryna saı kelmeıtin qyzmet kórsetip, sonyń saldarynan abaısyzda ekiden kóp adamnyń densaýlyǵyna zııan kelýine jáne adam ólimine jol bergeni úshin jazalandy.
Al gaz jetkizýshi osy bap boıynsha alty jylǵa bas bostandyǵynan aıyryldy.
Buǵan deıin atalǵan is boıynsha apellıatsııalyq shaǵymdy kimder jáne qandaı sebeppen bergeni týraly habarlaǵan edik.
