Şýchınskidegi órtten qaza tapqandardyń otbasyna 2 mln teńgeden tólendi

KÓKShETAÝ. KAZINFORM – Şýchınsk qalasyndaǵy «Tsentr plova» dámhanasynda bolǵan órt saldarynan qaza tapqan alty adamnyń otbasyna 2 mln teńgeden birjolǵy tólem berildi.

Aqmola oblysy ákimdigi baspasóz qyzmetiniń málimetinshe, óńirde jedel shtabtyń kóshpeli otyrysy ótti. Onda Býrabaı aýdanynyń ákimi Araı Sadyqov, oblystyq TJD basshysynyń orynbasary Murat Qangýjınov, oblystyq densaýlyq saqtaý basqarmasynyń basshysy Narıman Ermek jáne jumyspen qamtýdy úılestirý jáne áleýmettik baǵdarlamalar basqarmasynyń basshysy Sholpan Rahmatýllına atqarylǵan sharalar men zardap shekkenderdiń jaǵdaıy týraly baıandady.

Alty otbasy 2 mln teńgeden birjolǵy materıaldyq kómek alǵan. Jetinshi otbasyǵa tólem jasaý úshin qujattar daıyndalyp jatyr. Sonymen qatar dámhana ıesi de qaza tapqandardyń ár otbasysyna 2 mln teńgeden tólegen.

Ómirlik qıyn jaǵdaıǵa tap bolǵan bes otbasynyń nesıeleri demeýshiler esebinen óteledi. Taǵy tórt zardap shekken adamǵa kásipkerler qosymsha materıaldyq kómek kórsetedi.

Budan bólek, zańnamaǵa sáıkes áleýmettik tólemder taǵaıyndalǵan.

– Azamattardyń qaýipsizdigi sózsiz basym baǵyt bolyp qala beredi. Sondyqtan da qosymsha uıymdastyrýshylyq jáne aldyn alý sharalary qabyldanady. Zardap shekken otbasylarǵa jan-jaqty qoldaý kórsetiledi, – dedi Aqmola oblysynyń ákimi Marat Ahmetjanov.

Óńir basshysy oqıǵanyń sebepterin jan-jaqty ári obektıvti tergep, kináli tulǵalardy jaýapkershilikke tartýdy, sondaı-aq qaýipsizdik talaptarynyń saqtalýyn kúsheıtýdi tapsyrdy.

Eske salaıyq, buǵan deıin Şýchınskidegi dámhanada gaz jarylysy saldarynan alty adamnyń qaza tapqany habarlanǵan edi.

Keıin qaza tapqandar sany jetige jetti.

Oqıǵa faktisi boıynsha qylmystyq is qozǵaldy.