Şýchınskidegi qaıǵyly oqıǵadan keıin ákimdik gaz ballondaryn tekserýdi kúsheıtti
ASTANA. KAZINFORM — Aqmola oblysynyń ákimi qoǵamdyq tamaqtaný oryndary men adamdar kóp jınalatyn nysandarda gaz ballondaryn paıdalaný jáne órt qaýipsizdigi talaptarynyń saqtalýyn baqylaýdy kúsheıtýdi tapsyrdy.
Vedomstvonyń málimetinshe, gaz qaýipsizdigi jáne gazben jabdyqtaý salasyndaǵy baqylaý-qadaǵalaý fýnktsııalary aýdan jáne qala ákimdikteriniń turǵyn úı ınspektsııalaryna júktelgen.
Qazirgi ýaqytta jergilikti atqarýshy organdar tekserister men reıdtik is-sharalar júrgizip jatyr.
— Şýchınskidegi qaıǵyly jaǵdaıdan keıin oblys ákimi birqatar tapsyrma berdi. Sonyń ishinde qoǵamdyq tamaqtaný oryndary men adamdar kóp shoǵyrlanatyn nysandarda gaz ballondaryn paıdalaný jáne órt qaýipsizdigi talaptarynyń saqtalýyn kúsheıtý bar, — dep habarlady baspasóz qyzmeti.
Qazir mobıldi toptar áleýmettik ınfraqurylym nysandaryn, kópqabatty jáne jeke turǵyn úılerdi, sondaı-aq gaz toltyrý jáne avtogaz quıý stantsııalaryn aralap tekserýdi jalǵastyryp jatyr.
Sonymen qatar turmystyq gaz ballondaryn kádege jaratý pýnktterin ashý máselesin qarastyrý josparlanǵan. Bul yqtımal qaýipterdiń aldyn alýǵa baǵyttalǵan.
Budan bólek, óńirde aqparattyq-túsindirý jumystary júrgizilip jatyr: buqaralyq aqparat quraldary, áleýmettik jeliler jáne resmı resýrstar arqyly turǵyndarǵa turmysta gazdy qaýipsiz paıdalaný erejeleri túsindirilip jatyr. Ákimdik ókilderi aýdan jáne qala ákimdikteriniń tekseristeri men reıdteri áli de jalǵasyp jatqanyn atap ótti.
Eske sala keteıik, 26 aqpannan 27 aqpanǵa qaraǵan túni Şýchınsk qalasyndaǵy «Tsentr plova» kafesinde gaz-aýa qospasynyń jarylysy bolǵan.
Oqıǵa saldarynan 9 adam qaza taýyp, taǵy 26 adam jaraqat aldy.
Atalǵan derek boıynsha QR Qylmystyq kodeksiniń 292-babynyń 3-bóligi — «Órt qaýipsizdigi talaptaryn buzý, abaısyzda eki nemese odan da kóp adamnyń ólimine ákelip soǵý» boıynsha qylmystyq is qozǵaldy. Mekeme ıesi ustaldy.