Shýchınskidegi kafede bolǵan jarylystan qaza tapqandar sany jeti adamǵa jetti
KÓKShETAÝ. KAZINFORM — Aqmola oblysynyń ákimdigi Şýchınsk qalasynda bolǵan oqıǵaǵa qatysty jańa derekterdi jarııalady. Onda bes qabatty turǵyn úıge japsarlas salynǵan bir qabatty kafede gaz-aýa qospasynyń jarylysynan qaza tapqandar sany jeteýge jetti.
— Jedel derekterge súıensek, barlyǵy 26 adam zardap shekti, onyń ishinde 7 adam qaza tapty (marqumdardyń arasynda 16 jastaǵy qyz bar). 13 adam Býrabaı aýdandyq aýrýhanasynda jatyr. 6 adam ambýlatorııalyq baqylaýǵa jiberildi, — delingen habarlamada.
Sondaı-aq densaýlyq saqtaý basqarmasy jelisi boıynsha qosymsha medıtsınalyq brıgadalar jedel túrde jasaqtalǵan.
— Barlyq qajetti resýrstar jumyldyryldy: mamandar, dári-dármek, sanıtarlyq avıatsııa oqıǵa ornyna jiberildi. Oblystyq jedel shtab jumys istep jatyr. Oqıǵanyń sebepteri anyqtalyp jatyr. Aqmola oblysynyń ákimdigi qaza tapqandardyń otbasylaryna, sondaı-aq zardap shekkenderge barlyq qajetti kómekti kórsetedi, — delingen ákimdik aqparatynda.
Oblys ákimdigi sondaı-aq aqparatty tek resmı derekkózderden alýǵa shaqyrdy.
Eske salaıyq, 26 aqpannan 27 aqpanǵa qaraǵan túni Şýchınsk qalasyndaǵy kafede gaz-aýa qospasynyń jarylysy boldy. Alǵashynda alty adamnyń qaza tapqany habarlandy.